హత్యాయత్నం: సినీ విలన్ బాబా అరెస్టు (పిక్చర్స్)

By Pratap

Published: Tuesday, March 25, 2014, 8:51 [IST]

హైదరాబాద్: సినిమాల్లో విలన్ వేషాలు వేసే వ్యక్తి జీవితంలోనూ విలన్‌గా మారాడు. తప్పు చేయడమే కాకుండా పోలీసులకు ఫిర్యాదు చేశారనే కోపంతో కత్తితో దాడి చేశాడు. అతని చేతిలో గాయపడిన వ్యక్తి ఆస్పత్రిలో చికిత్స పొందుతున్నాడు. బాధితుల ఫిర్యాదు మేరకు పోలీసులు రంగంలోకి దిగారు. ఎనిమిది రోజుల పాటు గాలించి చివరకు సోమవారంనాడు అతన్ని పట్టుకున్నారు.

వివరాలు ఇలా ఉన్నాయి - హైదరాబాదులోని పహడీషరీఫ్‌కు చెందిన అబ్దుల్ రెహ్మాన్ అలియాస్ బాబా (34), సినిమాల్లో విలన్ పాత్రలు పోషిస్తుంటాడు. విక్రమార్కుడు, మాస్ తదితర సినిమాల్లో అతను విలన్‌గా నటించాడు. ఇతను గతంలో బంజారాహిల్స్ ప్రాంతానికి చెందిన మహ్మద్ ఫయాజ్ ఇంట్లో అద్దెకు ఉండేవాడు. అతను షూటింగుల నుంచి ఆలస్యంగా ఇంటికి వస్తుండడమే కాకుండా కొన్ని మార్లు ఫయాజ్ బంధువుల పట్ల అసభ్యంగా ప్రవర్తించాడు

అలాంటి సందర్బంలో ఓసారి ఫయాజ్, అతని బంధువులు కలిసి బాబాపై బంజారాహిల్స్ పోలీసులకు ఫిర్యాదు చేశారు. దీంతో కేసు నమోదైంది. దాంతో కోపంతో రగిలిపోయిన బాబా ఈ నెల 16వ తేదీన మాసబ్‌ట్యాంక్ చాచా నెహ్రూ పార్కు వద్ద ఫయాజ్‌పై కత్తితో దాడి చేశాడు. ఈ దాడిలో ఫయాజ్ తీవ్రంగా గాయపడ్డాడు. ఆ తర్వాత బాబా పారిపోయాడు.

బాబాపై బాధితులు ఫిర్యాదు చేయడంతో పోలీసులు దర్యాప్తు ప్రారంభించారు. ఎట్టకేలకు సోమవారం పట్టుకున్నారు. సోమవారం కోర్టులో ప్రవేశపెట్టి రిమాండ్‌కు తరలించారు. బాబు నుంచి కత్తిని స్వాధీనం చేసుకున్నారు. బాబాను పోలీసులు మీడియా ముందు ప్రవేశపెట్టారు.