ప్రియమైన చంద్రం అన్నయ్యకు.. సిగ్గుపడొద్దంటూ విజయసాయిరెడ్డి మరో పంచ్..
ఏపీలో చంద్రబాబు, ఆయన తనయుడు నారా లోకేష్ ను ఉద్దేశించి వైసీపీ ఎంపీ విజయసాయిరెడ్డి పెట్టే వ్యంగ్య ట్వీట్లు ఎప్పుడూ చర్చనీయాంశం అవుతూనే ఉంటాయి. ఇందులో సాయిరెడ్డి విసిరే పంచ్ లు టీడీపీతో పాటు ఆయన సొంత పార్టీ వైసీపీలోనూ చర్చకు దారి తీస్తుంటాయి. ఇదే క్రమంలో మరోసారి సాయిరెడ్డి వరుస ట్వీట్లతో పంచ్ లు విసురుతున్నారు.
ముఖ్యంగా చంద్రబాబు కర్నూలు టూర్ లో చోటు చేసుకున్న పరిణామాలపై రెండు రోజులుగా విజయసాయిరెడ్డి వరుస ట్వీట్లు పెడుతున్నారు. కర్నూల్లో చంద్రబాబు చేసిన లాస్ట్ ఛాన్స్ వ్యాఖ్యలపై ఇప్పటికే పంచ్ లు విసురుతున్న సాయిరెడ్డి.. ఇప్పుడు ఆయనకు వ్యతిరేకంగా లాయర్లు, వైసీపీ కార్యకర్తలు చేసిన నిరసనల్ని వాడుకుంటూ ట్వీట్ చేశారు. అదే సమయంలో చంద్రబాబు రాజకీయ ప్రస్ధానాన్ని సైతం గుర్తుచేస్తూ చంద్రబాబును సాయిరెడ్డి దెప్పిపొడిచారు.
"ప్రియమైన చంద్రం అన్నయ్యా ! మొదట్లోనే చంద్రగిరి నిన్ను ఛీపొమ్మంది. ఆ తరవాత హైదరాబాద్ తన్ని తరిమింది. ఇంతకుముందే ఉత్తరాంధ్ర ఉమ్మేసింది. ఇప్పుడు రాయలసీమ కూడా నిన్న గో బ్యాక్ అంటోంది ! అయినా సిగ్గుపడకు అన్నయ్యా ! ఎల్లో కుల మీడియాలో నీకు కావాల్సినంత ప్లేస్ ఉంది" అంటూ విజయసాయిరెడ్డి వరుస పంచ్ లతో రెచ్చిపోయారు. తద్వారా చంద్రబాబుకు అన్నిచోట్లా ఛీత్కారాలు తప్పడం లేదనే విషయాన్ని గుర్తుచేసారు.