జగనన్న ఆణిముత్యాల అవార్డులు ప్రదానం-విద్యాసంస్కరణల ఫలితమేనన్న సీఎం జగన్..
ఏపీలో ఈ ఏడాది పదో తరగతి, ఇంటర్ మీడియట్ లో టాపర్లుగా నిలిచిన విద్యార్దులకుసీఎం జగన్ ఇవాళ జగనన్న ఆణిముత్యాలు అవార్డుల్ని ప్రదానం చేశారు. వీరితో పాటు వారి తల్లితండ్రులు, ఉపాధ్యాయులు, హెచ్ఎంలను కూడా సన్మానించారు. రాష్ట్రంలో చేపడుతున్న విద్యాసంస్కరణల వల్లే వీళ్లంతా ప్రభుత్వ స్కూళ్లలో చదువుకుని టాపర్లుగా నిలిచినట్లు సీఎం జగన్ తెలిపారు.
పేదరికం వల్ల విద్యార్ధులు చదువులకు దూరం కాకూడదని ప్రభుత్వం నిర్ణయించడం వల్లే స్కూళ్ల రూపురేఖలు మార్చినట్లు సీఎం జగన్ తెలిపారు. మధ్యాహ్న భోజనం కూడా జగనన్న గోరుముద్దగా మార్చి అందిస్తున్నట్లు తెలిపారు. బడులు తెరిచే సమయానికి జగనన్న విద్యాకానుక ఇచ్చామన్నారు. అలాగే నాలుగేళ్లుగా ప్రభుత్వ బడుల్లో ఇంగ్లీష్ మీడియం, సీబీఎస్ఈ సిలబస్ అందుబాటులోకి తెచ్చామన్నారు. తొలిసారిగా ద్విభాషా పాఠ్యపుస్తకాలు కూడా అందుబాటులోకి తెచ్చినట్లు సీఎం తెలిపారు. అలాగే బైజూస్ కంటెంట్ తో కూడిన ట్యాబ్స్ కూడా ఇస్తున్నట్లు జగన్ వెల్లడించారు.
గతంలో క్లాస్ టీచర్లే ఉంటారా ఉండరా అన్న పరిస్దితి నుంచి ఇవాళ సబ్జెక్ట్ టీచర్లను పూర్తిస్ధాయిలో అందుబాటులోకి తెచ్చినట్లు సీఎం జగన్ తెలిపారు. ఆరో తరగతి నుంచి డిజిటల్ బోధన చేపడుతున్నట్లు వెల్లడించారు. ఏపీలో పేద విద్యార్ధులు అంతర్జాతీయంగా ఎదిగేందుకు వీలుగా టోఫెల్ పరీక్షకు సిద్ధం చేస్తున్నామన్నారు. రాష్ట్రంలో ప్రభుత్వ స్కూళ్లు ప్రైవేటు స్కూళ్లతో పోటీపడే పరిస్ధితి తెస్తున్నామన్నారు.
ప్రతీ ఒక్కరూ కనీసం డిగ్రీ చదవాలనే ఉద్దేశంతో పలు సంస్కరణలు చేపడుతున్నట్లు జగన్ వెల్లడించారు. ప్రపంచంలోని టాప్ కాలేజీల్లో సీట్లు తెచ్చుకునేందుకు విద్యార్ధులకు ప్రోత్సాహం అందిస్తున్నట్లు తెలిపారు. ఫీజులు కోటీ 20 లక్షలు కూడా భరించేందుకు సిద్ధమైనట్లు పేర్కొన్నారు. రాబోయే రోజుల్లో ప్రభుత్వ స్కూళ్లలో ఐబీ సిలబస్ కూడా తీసుకొస్తామన్నారు. అలాగే ప్రశ్నాపత్రాలు కూడా అంతర్జాతీయ ప్రమాణాలకు అనుగుణంగా తయారు చేయిస్తామన్నారు.
ప్రభుత్వ పాఠశాలల్లో చదువుకుంటున్న పేద, ఎస్సీ, ఎస్టీ, బీసీ, మైనార్టీ వర్గాలకు చెందిన పిల్లల్ని అంతర్జాతీయంగా పోటీ పడే విధంగా తీర్చి దిద్దుతున్నట్లు సీఎం జగన్ తెలిపారు. వీరంతా ఒక రోజు ప్రపంచాన్ని ఏలే రోజులు వస్తాయని జగన్ ఆశాభావం వ్యక్తంచేశారు. చదువులు వేగంగా మారుతున్నాయని, కృత్రిమమేథ, డేటా సైన్స్ వంటి టెక్నాలజీల యుగంలో విద్యార్ధులు వేగంగా ఎదిగేందుకు అన్ని విధాలా ప్రోత్సాహం అందిస్తామన్నారు. ప్రతీ పేద కుటుంబం కూడా ఈ మార్పుల్లో భాగస్వాములు కావాలన్నారు.
Click it and Unblock the Notifications
Sign in with Google