కూటమి సర్కార్ లో వైసీపీకి తొలి విజయం..! అక్కడ మారనున్న లెక్క..!

ఏపీలో గత వైసీపీ ప్రభుత్వం భారీ మెజార్టీతో కొనసాగినా తాజా సార్వత్రిక ఎన్నికల్లో అధికారం చేతులు మారడంతో ఆ పార్టీ పరిస్ధితి పూర్దిగా తలకిందులైంది. ముఖ్యంగా రాష్ట్ర అసెంబ్లీలో కేవలం 11 సీట్లతో అతి బలహీన ప్రతిపక్షంగా ఉన్న వైసీపీకి ఇప్పుడు చావో రేవో అన్నట్లుగా రాజకీయం చేయాల్సిన పరిస్దితి ఎదురవుతోంది. ఇలాంటి తరుణంలో ఆ పార్టీకి భారీ ఊరటనిచ్చే విజయం ఒకటి ఇవాళ వరించింది. దీంతో వైసీపీ శ్రేణులు ఆనందంలో మునిగిపోతున్నాయి.

రాష్ట్రంలో గతంలో విశాఖ స్ధానిక సంస్ధల కోటా నుంచి వైసీపీ ఎమ్మెల్సీగా ఎన్నికైన వంశీకృష్ణ యాదవ్ ఆ పార్టీకి గుడ్ బై చెప్పి ఎన్నికలకు ముందు జనసేనలో చేరిపోయారు. దీంతో ఆయనపై అనర్హత వేటు పడింది. ఈ నేపథ్యంలో విశాఖ స్ధానిక సంస్ధల ఎమ్మెల్సీ సీటుకు ఉపఎన్నిక అనివార్యమైంది. అయితే రాష్ట్రంలో కూటమి ప్రభుత్వం అధికారంలో ఉన్నా వైసీపికి మాత్రం విశాఖ స్ధానిక సంస్ధల సీటులో భారీ మెజార్టీ ఉంది. దీంతో కూటమి పోటీ నుంచి తప్పుకుంది.

ఈ నేపథ్యంలో వైసీపీ నుంచి విశాఖ స్దానిక సంస్ధల కోటా ఎమ్మెల్సీ ఉపఎన్నికల్లో పోటీ చేసిన బొత్స సత్యనారాయణ ఏకగ్రీవంగా ఎన్నికయ్యారు. ఈ మేరకు రిటర్నింగ్ అధకారి ఇవాళ ప్రకటన చేశారు. బొత్సకు పోటీగా స్వతంత్ర అభ్యర్ధి షేక్ సఫీ నిలబడినా చివరి నిమిషంలో నామినేషన్ ఉపసంహరించుకోవడంతో ఆయన ఏకగ్రీవంగా ఎన్నికయ్యారు. దీంతో ఈ నెల 30న జరగాల్సిన ఎన్నిక అవసరం లేకుండా పోయింది. ఇప్పుడు బొత్సను మండలిలో విపక్ష నేతగా నియమించేందుకు జగన్ ఏర్పాట్లు చేస్తున్నారు. ఇప్పటికే మండలిలో విపక్ష నేతగా ఎన్నికైన అప్పిరెడ్డి స్ధానంలో త్వరలో బొత్సను నియమించే అవకాశముంది.

English summary

ysrcp candidate botsa Satyanarayana unanimously elected as vizag local bodies mlc