Unstoppable Chandrababu : బాలయ్య షోలో చంద్రబాబు, లోకేష్-షూటింగ్ కు హాజరు
టాలీవుడ్ హీరో నందమూరి బాలకృష్ణ ఆహా ఓటీటీ ప్లాట్ ఫామ్ పై నిర్వహించే Unstoppable టీవీ షో ప్రాచుర్యం పొందింది. ఇందులో ఇప్పటికే పలువురు టాలీవుడ్ హీరోలు, హీరోయిన్లు, దర్శకులు పాల్గొన్నారు. వారితో బాలయ్య చేసే విన్యాసాలు, వేసే జోకులు ప్రేక్షకుల్ని అలరిస్తూనే ఉన్నాయి. ఇదే క్రమంలో ఈసారి మరో విశిష్ట అతిధి ఈ షోలో దర్శనమివ్వబోతున్నారు.
బాలయ్య అన్ స్టాపబుల్ షోలో ఈసారి అతిధులుగా టీడీపీ అధినేత, ఆయన బావ, వియ్యంకులు కూడా అయిన చంద్రబాబునాయుడు, ఆయన కుమారుడు, టీడీపీ ఎమ్మెల్సీ నారా లోకేష్ హాజరయ్యారు. హైదరాబాద్ లో జరుగుతున్న షూటింగ్ కు వీరు హాజరైన సందర్శంగా ఉల్లాసంగా కనిపించారు. వీరిని రిసీవ్ చేసుకుంటూ ఆహా నిర్వాహకులు, సిబ్బంది కూడా సంతోషంగా కనిపించారు. స్టూడియోకు హాజరైన చంద్రబాబును గీతా ఆర్ట్స్ అధినేత అల్లు అరవింద్ దగ్గరుండి రిసీవ్ చేసుకున్నారు.
నిత్యం రాజకీయాల్లో బిజీగా కనిపించే చంద్రబాబు, లోకేష్.. బాలయ్య అన్ స్టాపబుల్ షో షూటింగ్ కు హాజరుకావడం తెలుగు రాష్ట్రాల రాజకీయాల్లో చర్చనీయాంశమవుతోంది. అయితే ఎప్పటి నుంచో అనుకుంటున్నామని, ఇన్నాళ్లకు టైం కుదిరిందని వారు చెప్తున్నారు.
అయితే బాలయ్య షోలో చంద్రబాబు, లోకేష్ రాజకీయాల గురించి మాత్రమే మాట్లాడారా లేక ఏపీకి సంబంధించిన ఏయే అంశాల గురించి మాట్లాడారన్న దానిపై ఇంకా స్పష్టత రాలేదు. త్వరలో ఆహా ఓటీటీలో ప్రసారమయ్యే ఈ షో కోసం అభిమానులు కూడా ఉత్కంఠగా ఎదురుచూస్తున్నారు.