నిన్న బయో డైవర్సిటీ..నేడు భరత్‌నగర్: ఫ్లైఓవర్ నుంచి కిందపడ్డ కారు..!

Published: Tuesday, February 18, 2020, 8:32 [IST]

హైదరాబాద్: బయో డైవర్సిటీ ఫ్లైఓవర్ మీది నుంచి ఓ కారు ఏ రకంగా కిందికి దూసుకెళ్లిందో చూశాం. అలాంటి ఉదంతమే మరొకటి చోటు చేసుకుంది. ఈ సారి భరత్‌నగర్ ఫ్లైఓవర్‌పై నుంచి కిందికి పడింది ఓ కారు. ఈ ఘటనలో ఒకరు అక్కడికక్కడే దుర్మరణం పాలయ్యారు. మరో నలుగురు తీవ్రంగా గాయపడ్డారు. మంగళవారం తెల్లవారు జామున 3 గంటల సమయంలో ఈ ఘటన చోటు చేసుకుంది.

మృతుడిని సోహెల్‌గా గుర్తించారు. బోరబండలోని పండిట్ నెహ్రూనగర్‌కు నివాసిగా గుర్తించారు. అదే ప్రాంతానికి చెందిన స్నేహితులతో కలిసి కారులో ప్రయాణిస్తుండగా.. ఈ ఘటన చోటు చేసుకున్నట్లు పోలీసులు చెబుతున్నారు. మూసాపేట్ వైపు నుంచి సనత్‌నగర్ వస్తుండగా అతి వేగానికి కారు అదుపు తప్పింది. భరత్‌నగర్ ఫ్లైఓవర్ నుంచి కింద పడింది. అంత పైనుంచి కిందపడటంతో కారు నుజ్జునుజ్జయింది.

Car flies off flyover in Hyderabad, One died, four injured

సమాచారం అందుకున్న వెంటనే పోలీసులు సంఘటనా స్థలానికి చేరుకున్నారు. మృతదేహాన్ని స్వాధీనం చేసుకున్నారు. గాయపడ్డ వారిని సికింద్రాబాద్ గాంధీ ఆసుపత్రికి తరలించారు. వారిలో ఒకరి పరిస్థితి విషమంగా ఉన్నట్లు తెలుస్తోంది. కారు కింద పడిన సమయంలో సంఘటనాస్థలంలో ఎవరూ లేకపోవడంతో పెద్ద ప్రమాదం తప్పినట్టయింది. దీనిపై కేసు నమోదు చేసిన పోలీసులు దర్యాప్తు చేపట్టారు. ప్రమాదానికి కారణాలపై ఆరా తీస్తున్నారు.