Hyderabad: మరో ఘనత సాధించిన హైదరాబాద్.. ప్రపంచ సంపన్న నగరాల్లో చోటు..

హైదరాబాద్ :ఎంతో మందిని అక్కున చేర్చుకుంటున్న మహానగరం. ఈ పట్నంలో బీదవాడు నుంచి బిలియనీర్ వరకు ఉన్నారు. భాగ్యనగరం భిన్న మతాలకు, భిన్న సంస్కృతులకు నిలయం. లక్షల మందికి ఉపాధి కల్పిస్తున్న హైదరాబాద్ విశ్వనగరంగా అభివృద్ధి చెందుతోంది. ప్రపంచస్తాయి కంపెనీలు భాగ్యనగరంలో పెట్టుబడులు పెడుతున్నాయి. ముఖ్యంగా పట్నంలో ఐటీ రంగం వేగంగా అభివృద్ధి చెందుతోంది. ఈ క్రమంలో హైదరాబాద్ మరో ఘనత సాధించింది. ప్రపంచంలోనే అత్యంత సంపన్న నగరాల జాబితాలో భాగ్యనగరం చోటు దక్కించుకుంది.

అత్యంత సంపన్న నగరాల్లో హైదరాబాద్ 65వ స్థానంలో నిలిచింది. భాగ్యనగరంలో మొత్తం 11,100 మంది మిలియనీర్లు ఉన్నారని హెన్లీ అండ్‌ పార్ట్‌నర్స్‌ నివేదిక పేర్కొంది. 2012 నుంచి 2022 వరకు హైదరాబాద్‌లో మిలియనీర్లు 78 శాతం పెరిగిందని వివరించింది. ప్రపంచ అత్యంత సంపన్న నగరాల్లో అమెరికాలోని న్యూయార్క్‌ సిటీ మొదటి స్థానంలో ఉంది. న్యూయార్క్ లో 3,40,000 మంది మిలియనీర్లు ఉన్నట్లు నివేదిక పేర్కొంది. సంపన్న నగరాల్లో మొత్తం 97 నగరాలు స్థానం దక్కించుకున్నాయి. జపాన్ క్యాపిటల్ సిటీ టోక్యో సంపన్న నగరాల్లో రెండో స్థానంలో నిలిచింది.

టోక్యోలో 2,90,300 మంది మిలియనీర్లు ఉన్నారు. మూడో స్థానంలో శాన్ ప్రాన్సిస్కో నిలిచింది. ఈ నగరంలో 2,85,000 మంది మిలియనీర్లు ఉన్నారు. 2,58,000 మందితో లండన్ నాల్గో స్థానంలో ఉండగా.. 2,40,100 మందితో సింగపూర్ ఐదో స్థానంలో నిలిచింది. లాస్ ఏంజెల్స్ 2,05,400 మంది మిలియనీర్లతో ఆరో స్థానం దక్కించుకుంది. ఆ తర్వాతి స్థానాల్లో హాంకాంగ్, బీజింగ్, షాంఘై, సిడ్ని ఉన్నాయి. భారత్ నుంచి 30,200 మంది ఢిల్లీ 36 స్థానంలో నిలువగా.. బెంగళూరు 12,600 మంది మిలియనీర్లతో 60 స్థానం దక్కించుకుంది.

12,100 మంది మిలియనీర్లతో కలకత్తా 63 స్థానం దక్కించుకోగా.. హైదరాబాద్ 65 స్థానంలో నిలిచింది. అయితే భారత వాణిజ్య రాజధాని ముంబైకి చోటు దక్కకపోవడం గమనార్హం. ఆఫ్రికా, ఆస్ట్రేలియాసియా, సీఐఎస్‌, తూర్పు ఆసియా, ఐరోపా, మధ్యప్రాచ్యం, ఉత్తర అమెరికా, దక్షిణాసియా, ఆగ్నేయాసియా ఇలా వివిధ ప్రాంతాలుగా విభజించి హెన్లీ అండ్‌ పార్ట్‌నర్స్‌ సంపన్న నగరాల జాబితాను తయారు చేసింది.

English summary

Bhagyanagaram is among the richest cities in the world. Hyderabad is ranked 65th among the richest cities.