హైదరాబాద్ శివారు ఫాంహౌస్‌లపై పోలీసుల దాడులు: 26 మంది అరెస్ట్

హైదరాబాద్: నగర శివారులోని పలు ఫాంహౌస్‌లపై పోలీసులు సోమవారం దాడులు నిర్వహించారు. పలు ఫాంహౌస్‌లలో అసాంఘిక కార్యకలాపాలు జరుగుతున్నట్లు గుర్తించారు. దీంతో పలువురు నిందితులను అదుపులోకి తీసుకున్నారు ఎస్ఓటీ పోలీసులు.

మొయినాబాద్‌లోని బిగ్ బాస్ ఫాంహౌస్‌, జమంగీర్ డ్రీమ్ వ్యాలీ, శంషాబాద్ పరిధిలోని రిఫ్లైజ్ ఫాంహౌస్‌, మేడ్చల్ లోని గోవర్ధన్ రెడ్డి ఫాంహౌస్‌ లలో అసాంఘిక కార్యకలాపాలు జరుగుతున్నట్లు పోలీసులు గుర్తించారు. ఫాంహౌస్‌ల నుంచి మద్యం సీసాలు, హుక్కా సామాగ్రి, ప్లేయింగ్ కార్డ్స్, లక్ష రూపాయల నగదు, సెల్‌ఫోన్లు స్వాధీనం చేసుకున్నారు.

మొత్తం 32 ఫాంహౌస్‌లలో తనిఖీలు చేపట్టిన పోలీసులు.. అసాంఘిక కాకర్యకలాపాలకు పాల్పడుతున్న 26 మందిని అరెస్ట్ చేశారు. గతంలో కూడా ఫాంహౌస్‌లపై పోలీసులు దాడులు చేశారు. నగరానికి దూరంగా ఉండటంతో ఫాంహౌస్‌లలోనే ఎక్కువగా అసాంఘిక కార్యకలాపాలు జరుగుతున్నాయని ఫిర్యాదులు వస్తుండటంతో పోలీసులు తరచూ దాడులు నిర్వహిస్తున్నట్లు తెలుస్తోంది.

భారీగా గంజాయి పట్టివేత

భద్రాద్రి కొత్తగూడెం జిల్లాలో భారీ మొత్తంలో గంజాయిని స్వాధీనం చేసుకున్నారు పోలీసులు. బస్టాండ్ వైపు నుంచి భద్రాచలం బ్రిడ్జి వైపుగా అనుమానాస్పదంగా వస్తోన్న రెండు ఇన్నోవా కార్లను గుర్తించిన పోలీసులు.. తనిఖీ చేశారు. ఆ వాహనాల్లో 488 కిలోల గంజాయిని గుర్తించి, స్వాధీనం చేసుకున్నారు. ఈ మేరకు వివరాలను భద్రాద్రి కొత్తగూడెం జిల్లా ఎస్పీ జీ వినీత్ తెలిపారు. ఏపీ-ఒడిశా సరిహద్దు ప్రాంతం నుంచి మహారాష్ట్రకు గంజాయిని తరలిస్తున్నట్లు గుర్తించారు. దీని విలువ సుమారు 97.6 లక్షలు ఉంటుందని అంచనా వేశారు. ఇద్దరు నిందితులను అదుపులోకి తీసుకున్నారు.

English summary

Police raids in farmhouse in Hyderabad outskirts: 26 arrested for illegal activities.