భారత్ లో 781ఒమిక్రాన్ కేసులు, ఢిల్లీలో అత్యధికం; రోజువారీ కోవిడ్ కేసులలోనూ 44శాతం జంప్

Updated: Wednesday, December 29, 2021, 17:21 [IST]

భారతదేశంలో ఒమిక్రాన్ కేసుల సంఖ్య రోజురోజుకీ పెరుగుతోంది. భారతదేశంలో అత్యధికంగా వ్యాపించే కరోనా వైరస్ వేరియంట్ ఒమిక్రాన్ మొత్తం సంఖ్య 781కి చేరుకుంది. కేసుల సంఖ్య పెరుగుతుండటం ప్రస్తుతం ఆందోళన కలిగిస్తుంది . నవంబర్‌లో దక్షిణాఫ్రికాలో మొదటిసారిగా గుర్తించబడిన ఒమిక్రాన్ వేరియంట్ ఇప్పుడు దేశంలోని 21 రాష్ట్రాలకు వ్యాపించింది. ఢిల్లీలో అత్యధికంగా 238 కేసులతో ఓమిక్రాన్ కౌంట్ ఉండగా, 167 కేసులతో మహారాష్ట్ర ఒమిక్రాన్ కేసులలో రెండో స్థానంలో ఉంది.

భారత్ లో 9,195 తాజా కరోనా కేసులు

ఇదిలా ఉంటే మరోపక్క భారత్ లో కరోనా కేసుల సంఖ్య పెరుగుతుంది. భారతదేశంలో గత 24 గంటల్లో 9,195 తాజా కోవిడ్-19 కేసులు నమోదయ్యాయి. దేశంలో కరోనా కేసులు పెరుగుతున్న తీరు కూడా ప్రస్తుతం ఆందోళన కలిగిస్తోంది. ఇది నిన్నటి 6,358 కేసుల కంటే 44 శాతం ఎక్కువ. దేశవ్యాప్తంగా వ్యాక్సినేషన్ డ్రైవ్‌ను ప్రభుత్వం నిరంతరం వేగవంతం చేస్తోంది. అయినప్పటికీ కరోనా కేసులు పెరగడంతో దేశవ్యాప్తంగా అనేక రాష్ట్రాలు కఠిన నిబంధనలను అమల్లోకి తెచ్చాయి.

భారత దేశంలో క్రియాశీల కేసుల సంఖ్య 77,002

ఇప్పటివరకు భారతదేశంలో 143 కోట్లకు పైగా వ్యాక్సిన్ డోస్‌లు అందించబడ్డాయి. ఇది కోవిడ్19కి వ్యతిరేకంగా పోరాటంలో ఒక ముఖ్యమైన మైలురాయిగా నిలిచింది. రికవరీ రేటు ప్రస్తుతం 98.40 శాతంగా ఉంది, ఇది మార్చి 2020 నుండి అత్యధికం. ఇదిలా ఉంటే గత 24 గంటల్లో కనీసం 7,347 మంది కోలుకున్నారు. కోలుకున్న వారి సంఖ్య 3,42,51,292 గా ఉంది. యాక్టివ్ కేసులు మొత్తం కేసుల్లో 1 శాతం కంటే తక్కువగా ఉన్నాయి, ప్రస్తుతం 0.22 శాతం యాక్టివ్ కేసులున్నాయి, మార్చి 2020 నుండి అతి తక్కువగా చెప్పొచ్చు. ప్రస్తుతం క్రియాశీల కేసుల సంఖ్య 77,002 వద్ద ఉంది. 0.68 శాతం ఉన్న వారం వారీ సానుకూలత రేటు గత 45 రోజులుగా 1 శాతం కంటే తక్కువగా ఉంది. గత 86 రోజులలో రోజువారీ సానుకూలత రేటు 0.79 శాతం గా ఉంది.

కోవిడ్ 19 కేసుల సంఖ్య గత వారం ప్రపంచవ్యాప్తంగా 11 శాతం పెరుగుదల

ఒమిక్రాన్ వేరియంట్ వల్ల కలిగే ప్రమాదం "చాలా ఎక్కువ" అని ప్రపంచ ఆరోగ్య సంస్థ తాజాగా తెలిపింది. చాలా ఎక్కువగా వ్యాప్తి జరిగితే పరిస్థితి అదుపు తప్పుతుందని పేర్కొంది. కోవిడ్ 19 కేసుల సంఖ్య గత వారం ప్రపంచవ్యాప్తంగా 11 శాతం పెరిగింది. ఒమి క్రాన్ అనేక దేశాలలో వేగవంతమైన వ్యక్తిని చూపిస్తుంది. ఇది గతంలో ఆధిపత్యం చెలాయించిన డెల్టా వేరియంట్‌ను ఇప్పటికే అధిగమించిందని ప్రపంచ ఆరోగ్య సంస్థ తన వారపు ఎపిడెమియోలాజికల్ అప్‌డేట్‌లో తెలిపింది.

ఒమిక్రాన్ వేరియంట్ కు రోగనిరోధకతను ఏమార్చే గుణం

బ్రిటన్, దక్షిణాఫ్రికా మరియు డెన్మార్క్ నుండి ప్రారంభ డేటా ప్రకారం డెల్టాతో పోలిస్తే ఒమిక్రాన్‌కు ఆసుపత్రిలో చేరే ప్రమాదం తగ్గిందని సూచించింది. అయినప్పటికీ, ఆక్సిజన్, వెంటిలేషన్ మరియు మరణంతో సహా క్లినికల్ సదుపాయాల పరంగా ఒమిక్రాన్ యొక్క తీవ్రతను అర్థం చేసుకోవడానికి మరింత డేటా అవసరం అని తెలుస్తుంది. ఒమిక్రాన్ వేరియంట్ కు ఎక్కువగా వ్యాపించే సామర్ధ్యం ఉండటంతో పాటు రోగనిరోధకతను ఏమార్చే గుణం ఒమిక్రాన్ వేరియంట్ కు ఉండడంతో ప్రస్తుతం ఆందోళన కొనసాగుతోంది.ఇప్పటి వరకు ఒమిక్రాన్ వేరియంట్ 130 దేశాలకు విస్తరించింది.