LPG Cylinder Price : మళ్లీ పెరిగిన గ్యాస్ సిలెండర్ ధర-ఈసారి ఎంతో తెలుసా ?

దేశవ్యాప్తంగా చమురు ధరలు మండిపోతున్నాయి. ఇప్పటికే పెట్రోల్, డీజిల్ వంటి పెట్రో ఉత్పత్తుల ధరలతో పాటు గ్యాస్ ధరలు కూడా ఆకాశాన్నంటుండగా.. తాజాగా మరోసారి చమురు సంస్ధలు ధరల మోత మోగించడం మొదలుపెట్టాయి. ఈ మధ్య గృహ అవసరాలకు వాడే గ్యాస్ సిలెండర్ల ధరల్ని రూ.50 మేర పెంచిన చమురు సంస్ధలు ఇప్పుడు మళ్లీ పెంచాయి.

గృహ అవసరాలకు వాడే 14.2 కిలోల గ్యాస్ సిలెండర్ ధర ఇప్పటికే వెయ్యి రూపాయుల దాటిపోగా.. ఇవాళ మరో 3.5 రూపాయలు పెంచుతూ చమురు సంస్ధలు నిర్ణయం తీసుకున్నాయి. దీంతో ఈ నిర్ణయం వెంటనే అమల్లోకి రానుంది. దేశవ్యాప్తంగా చమురు ధరల పెరుగుదల స్ధిరంగా కొనసాగుతుండగా.. గ్యాస్ ధరలు కూడా మండిపోతున్నాయి. ఇప్పటికే వెయ్యి రూపాయలకు పైగా వెచ్చించి గ్యాస్ సిలెండర్లు కొనలేక జనం ప్రభుత్వం ఇచ్చిన ఉజ్వల గ్యాస్ సిలెండర్ల రీఫిల్లింగ్ చేయించడమే మానేస్తున్న పరిస్ధితి. ఇప్పుడు తాజా పెంపుతో గృహవినియోగదారులపై మరింత భారం పడబోతోంది.

కేంద్రం పెట్రోల్, డీజిల్ ధరల తరహాలోనే గ్యాస్ ధరల్ని కూడా చమురు సంస్ధల చేతుల్లోనే పెట్టడంతో అవి భారీగా లాభాలు అర్జిస్తున్నాయి. విదేశాల నుంచి దిగుమతి చేసుకుంటున్న ముడి చమురు ధరల్లో స్ధిరత్వం లేకపోయినా భారత్ లో మాత్రం స్ధిరంగా ధరలు పెంచేస్తున్నాయి. ఈ క్రమంలో గత ఏడేళ్లలో లక్షల కోట్లు లాభాలార్జించిన చమురు సంస్ధలు ఇంకా జనాన్ని పీల్చి పిప్పి చేయడం మాత్రం మానడం లేదు. అంతర్జాతీయ మార్కెట్లో భారీగా ధరలు పెరిగినప్పుడు భారీగా మోత మోగిస్తున్న ఆయా సంస్ధలు.. తగ్గినప్పుడు మాత్రం తగ్గించకుండా అవే ధరల్ని కొనసాగించడం ద్వారా వినియోగదారుల్ని మోసం చేస్తున్నాయన్న ఆరోపణల్ని కూడా ఎదుర్కొంటున్నాయి.

English summary

oil companies have hiked domestic gas cylnder prices in india once agian today.