కేంద్ర మంత్రి రాజీనామా..! ఢిల్లీ నిరసన వేళ అనూహ్య పరిణామం..!

కేంద్రమంత్రి ఎల్ మురుగన్ ( L Murugan) తన పదవికి ఇవాళ అకస్మాత్తుగా రాజీనామా చేశారు. ఈ మేరకు ప్రధాని మోడీకి తన రాజీనామా లేఖను పంపారు. తన రాజీనామా వెనుక ఉన్న కారణాలను కూడా ఇందులో వివరించారు. ఆ తర్వాత మీడియాతో మాట్లాడుతూ అవే కారణాలను వెల్లడించారు. ప్రధాని మోడీ తాజాగా తమిళనాడులో పర్యటించారు. ఈ పర్యటన తర్వాత తాను ఈ నిర్ణయం తీసుకున్నట్లు కేంద్రమంత్రి మురుగన్ వెల్లడించారు. ఓవైపు ఢిల్లీలో నిరసనలు, మరోవైపు కేబినెట్ ప్రక్షాళన వార్తల వేళ మురుగన్ రాజీనామా చర్చనీయాంశమవుతోంది.

తమిళనాడుకు వెళ్లాలనే తన కోరికను తెలియజేస్తూ ప్రధాన మంత్రి నరేంద్ర మోదీకి లేఖ రాసినట్లు కేంద్రమంత్రి ఎల్ మురుగన్ తెలిపారు. తమ రాష్ట్రంలో బీజేపీని బలోపేతం చేయాలని, 2029 ఎన్నికలకు సన్నద్ధం కావాలని భావిస్తున్నట్లు పేర్కొన్నారు. మన ప్రధాన మంత్రి ఎల్లప్పుడూ తమిళుల ఆత్మగౌరవాన్ని ప్రపంచ స్థాయికి తీసుకువెళ్లారని, రెండు రోజుల క్రితం గౌరవనీయులైన మన ప్రధాన మంత్రి తమిళనాడులో పర్యటించారని తెలిపారు. ఆయన పట్ల ప్రజల్లో ఉన్న ఉత్సాహాన్ని, ప్రేమను, ఆప్యాయతను తాను స్వయంగా చూశానన్నారు. అందుకే, అక్కడికి వెళ్లి పార్టీని బలోపేతం చేసే దిశగా మరింత విస్తృతంగా పనిచేయాలని నిర్ణయించుకున్నానని వెల్లడించారు. తన మంత్రిత్వ బాధ్యతల నుండి విముక్తం చేసి, పార్టీని బలోపేతం చేసేందుకు తనను తమిళనాడుకు పంపాల్సిందిగా ప్రధాన మంత్రిని కోరినట్లు మురుగన్ తెలిపారు.

#WATCH | Delhi | On resigning as Union Minister & Rajya Sabha MP, BJP leader L. Murugan says, "I have written a letter to the Prime Minister Narendra Modi, expressing my desire to go to Tamil Nadu. I want to strengthen my party in the state and prepare the ground for the 2029 elections. Our Prime Minister has always taken Tamil pride to the global level...Two days ago, our Hon'ble Prime Minister also visited Tamil Nadu. I witnessed the people's enthusiasm, love and affection towards him. Therefore, I thought I should go there and work more extensively to strengthen our party. I requested the Prime Minister to relieve me of my ministerial responsibilities and send me to the state to strengthen the party..."

— ANI (@ANI) October 13, 2026

తమిళనాడులోని కుసేర్ గ్రామంలోని ఒక పేద కుటుంబం నుండి తన ప్రస్థానాన్ని మొదలుపెట్టినట్లు మురుగన్ గుర్తుచేసుకున్నారు. తన తల్లిదండ్రులు రోజువారీ కూలీలుగా, పశువుల కాపరులుగా పనిచేసేవారని తెలిపారు. తాను రాజకీయ కుటుంబం నుండి రాలేదని, చాలా పేద కుటుంబం నుండి వచ్చానన్నారు. తమ కుమారుడు ప్రభుత్వంలో పనిచేస్తాడని తన తల్లిదండ్రులు ఎన్నడూ ఊహించి ఉండరని కూడా ఆయన తెలిపారు. మహాకవి సుబ్రహ్మణ్య భారతి, సర్దార్ వల్లభాయ్ పటేల్, శ్యామా ప్రసాద్ ముఖర్జీల జాతీయవాద ఆదర్శాల నుండి తాను స్ఫూర్తి పొందినట్లు మురుగన్ చెప్పారు. ఆయన కాలేజీ రోజుల్లోనే ఏబీవీపీలో చేరారు. ఏబీవీపీ, బీజేపీలలో దాదాపు మూడు దశాబ్దాలుగా తన మార్గదర్శక సూత్రం "ముందు దేశం, తర్వాత పార్టీ, చివర నేను" అని ఆయన లేఖలో తెలిపారు.

గతంలో మురుగన్ జాతీయ షెడ్యూల్డ్ కులాల కమిషన్ ఉపాధ్యక్షుడిగా, రాజ్యసభ సభ్యుడిగా పనిచేశారు. జూలై 2021లో కేంద్ర మంత్రివర్గంలో చేరారు. రాష్ట్రంలో తమిళ సంస్కృతిని ప్రోత్సహించడంలోనూ, అభివృద్ధి ప్రాజెక్టులకు మద్దతు ఇవ్వడంలోనూ ప్రధాని మోదీ కీలక పాత్ర పోషించారని మురుగన్ తెలిపారు. చెన్నై మెట్రో, తూత్తుకుడి పోర్ట్, హైవేల విస్తరణ, అమృత్ భారత్ స్టేషన్ పథకం కింద రైల్వే స్టేషన్ల పునరాభివృద్ధి, లోతైన సముద్రంలో చేపలు పట్టే నౌకలకు మద్దతును గుర్తుచేసుకున్నారు. కాశీ తమిళ సంగమం, పార్లమెంటులో సెంగోల్ ప్రతిష్ఠాపన వంటి కార్యక్రమాలు తమిళ వారసత్వానికి మరింత గుర్తింపును తెచ్చిపెట్టాయని ఆయన ప్రస్తావించారు. సంఘర్షణ ప్రాంతాల్లో చిక్కుకున్న తమిళుల భద్రత, భారతీయ మత్స్యకారుల సంక్షేమానికి సంబంధించిన సమస్యలపై ప్రధాని మోదీ జోక్యం చేసుకున్నారని అన్నారు. పొంగల్ వేడుకల సందర్భంగా ప్రధాని తన నివాసానికి వచ్చిన విషయాన్ని కూడా ఆయన గుర్తుచేసుకున్నారు. క్షేత్రస్థాయి కార్యకర్తలను బీజేపీ గుర్తించడం వల్ల తాను ఊహించని అవకాశాలు లభించాయని మురుగన్ తన లేఖలో పేర్కొన్నారు. ఆయన ఇప్పుడు తమిళనాడు వ్యాప్తంగా గ్రామాలు, వీధులను సందర్శించి, పార్టీ కార్యకర్తలను కలిసి, సంస్థ ఉనికిని విస్తరించాలని కోరుకుంటున్నట్లు తెలిపారు. సబ్ కా సాథ్, సబ్ కా వికాస్, సబ్ కా విశ్వాస్ అనే సందేశాన్ని రాష్ట్రవ్యాప్తంగా ప్రజలకు చేరవేసి, 2029 లోక్‌సభ ఎన్నికలలో బీజేపీ మరింత బలమైన పాత్ర పోషించడానికి సహాయపడతానని ఆశిస్తున్నట్లు మురుగన్ తెలిపారు.