ఇమ్రాన్ ఖాన్ ఇంట్లో 40 మంది తీవ్రవాదులు ? ముట్టడించిన పోలీసులు

Updated: Wednesday, May 17, 2023, 17:06 [IST]

పాకిస్తాన్ మాజీ ప్రధాని ఇమ్రాన్ ఖాన్ కు అధికారం కోల్పోయిన తర్వాత వరుసగా ఇబ్బందులు చుట్టుముడుతున్నాయి. ఇప్పటికే ఆయనపై 140 కేసులు మోపిన షెబాజ్ షరీఫ్ ప్రభుత్వం.. ఆయన్ను అరెస్టు కూడా చేసింది. చివరికి కోర్టులు బెయిల్ ఇవ్వడంతో ఊరట లభించిందని భావిస్తున్న తరుణంలో ఇవాళ ఇమ్రాన్ ఇంట్లో 40 మంది తీవ్రవాదులు దాక్కున్నారనే ప్రచారం సాగుతోంది. దీంతో పంజాబ్ పోలీసులు లాహోర్ లోని ఆయన ఇంటిని చుట్టుముట్టారు.

ఇమ్రాన్ ఖాన్ ఇంట్లో కనీసం 30-40 మంది ఉగ్రవాదులు ఆశ్రయం పొందారని అనుమానిస్తూ లాహోర్‌లోని మాజీ ప్రధాని జమాన్ పార్క్ నివాసాన్ని పంజాబ్ తాత్కాలిక ప్రభుత్వం తమ నియంత్రణలోకి తీసుకుంది. తీవ్రవాదుల్ని తమకు అప్పగించాలని ఇమ్రాన్ పార్టీ పీటీఐని పంజాబ్ పోలీసులు కోరారు. ఉగ్రవాదులు ఇమ్రాన్ ఖాన్ నివాసంలో దాక్కున్నట్లు తమకు నిఘా వర్గాల సమాచారం ఉందని పాక్ మంత్రి అమీర్ మీర్ ప్రకటించారు.

మే 9 తర్వాత మాజీ ప్రధాని ఇమ్రాన్ ఖాన్‌పై దాఖలైన ఏ కేసులోనైనా అరెస్టు చేయకుండా ఉండేందుకు పాక్ సుప్రీంకోర్టు.. తన ఆదేశాలను మే 31 వరకు పొడిగించింది. 70 ఏళ్ల పీటీఐ పార్టీ చీఫ్ ఇమ్రాన్ పై దాఖలైన కేసుల గురించి సమాచారాన్ని అందించడానికి ఈ గడువు ఇచ్చింది. ఈ లోపే తీవ్రవాదులు దాక్కున్నారన్న సమాచారంతో పంజాబ్ పోలీసులు ఇమ్రాన్ ఇంటిని చుట్టుముట్టడం కలకలం రేపుతోంది. ఇమ్రాన్ ను మరోసారి అరెస్టు చేసేందుకే ప్రభుత్వం ఇలాంటి పన్నాగాలు పన్నుతోందని పీటీఐ నేతలు ఆరోపిస్తున్నారు.

ఇమ్రాన్ ఖాన్ పై నమోదు చేసిన పలు కేసుల్లో దర్యాప్తు వేగవంతం చేయడం ద్వారా వచ్చే ఎన్నికలకు ముందు ఆయన్ను రాజకీయంగా దెబ్బ తీసేందుకు షెబాజ్ షరీఫ్ ప్రభుత్వం తీవ్రంగా ప్రయత్నిస్తోంది. ఇందులో భాగంగానే ఇలాంటి చర్యలకు పాల్పడుతున్నట్లు పీఐటీ నేతలు ఆరోపిస్తున్నారు. అయితే ఇమ్రాన్ మాత్రం ఇంట్లోనే ఉన్నట్లు తెలుస్తోంది.