గద్వాల బరిలో డీకే అరుణ లేనట్టే.. కారణం ఏమిటంటే!!

ఎన్నికలకు సమయం దగ్గర పడుతున్న తరుణంలో తెలంగాణ బిజెపిలో ఆసక్తికర రాజకీయ పరిణామాలు చోటు చేసుకుంటున్నాయి. నవంబర్ 30వ తేదీన తెలంగాణ అసెంబ్లీ ఎన్నికలు జరగనుండగా ఇప్పటికే ఈసారి జరిగే ఎన్నికలలో బిజెపి నుండి డాక్టర్ లక్ష్మణ్, కిషన్ రెడ్డి పోటీకి దూరంగా ఉంటున్నట్టు ప్రకటించారు. రాష్ట్రవ్యాప్తంగా తాము ప్రచారం చేస్తామని వెల్లడించారు.

అయితే ప్రస్తుతం వారి బాటలోనే గద్వాల ఎమ్మెల్యే డీకే అరుణ తెలంగాణ అసెంబ్లీ ఎన్నికల్లో పోటీ చేయడానికి నిరాసక్తి చూపిస్తున్నారు. ఈ మేరకు ఆమె గద్వాల ఎన్నికల బరిలో ఉండబోనని స్పష్టం చేశారు. గద్వాల్ ఎన్నికల్లో పోటీలో ఉండబోనని అధిష్టానానికి కూడా డీకే అరుణ తన నిర్ణయాన్ని తేల్చి చెప్పారు. అయితే తాను లోక్సభ ఎన్నికలలో పోటీ చేస్తానని వెల్లడించారు.

ఇక ఈ పరిణామంతో గద్వాలలో బిజెపి నుండి ఎవరు బరిలోకి దిగబోతున్నారు అన్నది ప్రస్తుతం ఆసక్తికరంగా మారింది. గద్వాల నియోజకవర్గం నుండి అసెంబ్లీ ఎన్నికల్లో పోటీ చేసేందుకు ఆ పార్టీ ఉపాధ్యక్షురాలు డీకే అరుణ నిరాసక్తత చూపడంతో గద్వాలలో నాయకత్వ శూన్యత నెలకొంది.

ఒకపక్క బి ఆర్ ఎస్ పార్టీ నుండి బండ్ల కృష్ణమోహన్ రెడ్డి ని బీఆర్ఎస్ మళ్ళీ ప్రతిపాదించగా, కాంగ్రెస్ పార్టీ నుండి గద్వాల జడ్పీ చైర్ పర్సన్ సరితను అభ్యర్థిగా ప్రకటించారు. కానీ బిజెపి నుంచి మాత్రం ఇంకా అభ్యర్థిని ప్రకటించలేదు. ఇప్పటికే బీఆర్ఎస్, కాంగ్రెస్ రెండూ ఎన్నికల ప్రచారంలో దూసుకుపోతుంటే బిజెపి మాత్రం దిక్కుతోచని స్థితిలో పడిపోయింది.

అయితే తన స్వయంగా చేసుకున్న సర్వేల్లో మూడో స్థానంలో రావడంతో డీకే అరుణ వెనకనుంచి వేశారని స్థానికంగా చర్చ జరుగుతుంది. అయితే గద్వాలలో బీసీ అభ్యర్థిని బరిలోకి దింపబోతున్నట్టు పార్టీ శ్రేణులు చెబుతున్నప్పటికీ, బీసీని రంగంలోకి దింపితే అది ఏమేరకు ఫలితాలను ఇస్తుంది అనేది మాత్రం ఆసక్తికరమే. ఏది ఏమైనా ప్రస్తుతం గద్వాల బీజేపీ లో డీకే అరుణ తీసుకున్న నిర్ణయం తో ఒక అనిశ్చితి నెలకొంది.

English summary

DK Aruna will stay away from the contest from Gadwal. She clarified her opinion to this extent. She is planning to contest the Lok Sabha elections.