మెట్రో తరహాలో, ట్రాఫిక్ లేకుండా సిటీ బస్సుల ప్రయాణం.. రేవంత్ సర్కార్ ప్లాన్
హైదరాబాద్ మహానగరంలో నానాటికీ పెరిగిపోతున్న ట్రాఫిక్ సమస్యలకు శాశ్వత పరిష్కారం చూపేందుకు మరియు ప్రజా రవాణాను మరింత బలోపేతం చేసేందుకు తెలంగాణ ప్రభుత్వం ఒక ప్రతిష్టాత్మక ప్రణాళికను సిద్ధం చేస్తోంది. ఇప్పటికే ఎక్కడికక్కడ ఫ్లై ఓవర్ల నిర్మాణంపైన ఫోకస్ చేస్తున్న తెలంగాణా సర్కార్, మెట్రో రైలు సేవలతో పటు ట్రాఫిక్ రద్దీని తగ్గించే అనేక ప్రత్యామ్నాయ మార్గాలను చూస్తోంది.
మెట్రో రైలు తరహాలో సిటీ బస్సులకు బస్ ర్యాపిడ్ ట్రాన్సిట్ సిస్టమ్
నగరంలో సిటీ బస్సు ప్రయాణాన్ని మెట్రో రైలు తరహాలో వేగవంతం చేసే ఉద్దేశంతో 'బస్ ర్యాపిడ్ ట్రాన్సిట్ సిస్టమ్' (BRTS)ను ప్రవేశపెట్టేందుకు రవాణా, రోడ్లు మరియు భవనాల (R&B) శాఖలు ముమ్మర కసరత్తు ప్రారంభించాయి. తక్కువ ఖర్చుతో కూడిన ఈ ఆధునిక వ్యవస్థ ద్వారా నగరవాసులకు ట్రాఫిక్ రహిత ప్రయాణాన్ని అందించడమే ప్రధాన లక్ష్యంగా పని చేయనున్నాయి.
రహదారులపై ప్రత్యేక కారిడార్ లు
బీఆర్టీఎస్ విధానంలో సిటీ బస్సుల కోసమే రహదారులపై ప్రత్యేక కారిడార్లు లేదా లేన్లను కేటాయిస్తారు. ఈ ప్రత్యేక మార్గాలలో కేవలం ప్రభుత్వ బస్సులను మాత్రమే అనుమతిస్తారు కాబట్టి ట్రాఫిక్ జామ్ల సమస్య ఉండదు. అంతేకాకుండా, ప్రయాణికులు బస్సు ఎక్కే ముందే మెట్రో స్టేషన్ల తరహాలో ప్లాట్ఫారమ్లపైనే స్మార్ట్ టికెటింగ్ పద్ధతిలో ముందస్తు టికెట్లు కొనుగోలు చేయవచ్చు.
ప్రత్యేక స్మార్ట్ ట్రాఫిక్ సిగ్నల్ వ్యవస్థతో BRTS
దీనివల్ల బస్సు లోపల సమయం వృథా కాదు. బస్సుల రాకపోకల సమయంలో జాప్యం లేకుండా ఉండేందుకు కూడళ్ల వద్ద వీటికి ప్రాధాన్యతనిచ్చే ప్రత్యేక స్మార్ట్ ట్రాఫిక్ సిగ్నల్ వ్యవస్థను కూడా అనుసంధానిస్తారు. ప్రస్తుతం ప్రపంచవ్యాప్తంగా దాదాపు 170కి పైగా ప్రముఖ నగరాల్లో, అలాగే మన దేశంలోని అహ్మదాబాద్ జన్మార్గ్, పుణె రెయిన్బో నగరాలలో ఈ బీఆర్టీఎస్ వ్యవస్థ విజయవంతంగా నడుస్తోంది.
మెట్రోతో పోలిస్తే ఖర్చు తక్కువ.. ప్లాన్ చేస్తున్న తెలంగాణా సర్కార్
భారీ వ్యయంతో కూడుకున్న మెట్రో రైలు ప్రాజెక్టులతో పోలిస్తే దీని నిర్మాణ ఖర్చు చాలా తక్కువ. ప్రభుత్వ ఆదేశాల మేరకు ఆర్అండ్బీ మరియు జీహెచ్ఎంసీ ఇంజినీర్లు హైదరాబాద్లోని ప్రధాన రహదారులు, ఫ్లైఓవర్లు మరియు ప్రస్తుత మెట్రో మార్గాలను పరిశీలిస్తూ దీని సాధ్యాసాధ్యాలపై సమగ్ర నివేదికను రూపొందిస్తున్నారు. ఈ వ్యవస్థ అమల్లోకి వస్తే వ్యక్తిగత వాహనాల వాడకం తగ్గి, నగరంలో వాయు కాలుష్యం కూడా గణనీయంగా తగ్గుతుందని నిపుణులు భావిస్తున్నారు.
Click it and Unblock the Notifications
Sign in with Google