రోహిత్ వేముల బిల్లు ముసాయిదా మూడు నెలల్లోనే!
ఉన్నత విద్యాసంస్థల్లో విద్యార్థులపై కులం, సామాజిక నేపథ్యం ఆధారంగా జరుగుతున్న వివక్షను అడ్డుకునేందుకు తెలంగాణ ప్రభుత్వం సమగ్ర చట్టం తీసుకురాబోతోంది. దీనికి సంబంధించి రోహిత్ వేముల తెలంగాణ బిల్లు ముసాయిదాను మూడు నెలల్లోగా సిద్ధం చేయాలని ఉప ముఖ్యమంత్రి మల్లు భట్టి విక్రమార్క అధికారులకు స్పష్టమైన ఆదేశాలు జారీ చేశారు.
తాజాగా సచివాలయంలో భట్టి విక్రమార్క అధ్యక్షతన రోహిత్ వేముల తెలంగాణ బిల్లుపై మంత్రివర్గ ఉపసంఘం రెండో సమావేశం జరిగింది. ఈ సమావేశంలో ప్రతిపాదిత బిల్లు రూపకల్పనకు అనుసరించాల్సిన విధానం, కమిటీ కూర్పు, న్యాయపరమైన అంశాలు, వివిధ వర్గాలతో సంప్రదింపుల ప్రక్రియపై విస్తృతంగా చర్చ జరిగింది.
మంత్రులు పొన్నం ప్రభాకర్, అడ్లూరి లక్ష్మణ్ కుమార్ తదితరులు పాల్గొన్నారు. ఈ బిల్లు విశ్వవిద్యాలయాలు, ఉన్నత విద్యాసంస్థల్లో విద్యార్థుల హక్కులను పరిరక్షించేలా, కులం లేదా సామాజిక నేపథ్యం ఆధారంగా ఎలాంటి వివక్షకు తావు లేకుండా సమగ్ర చట్టంగా రూపొందాలని భట్టి స్పష్టం చేశారు.
ప్రాథమిక ముసాయిదాను సిద్ధం చేసి సీనియర్ సివిల్ సర్వెంట్ల కమిటీకి సమర్పించాలని ఆదేశించారు. కమిటీ ఏర్పాటు నుంచి వివిధ భాగస్వామ్య పక్షాలతో సంప్రదింపుల వరకు ప్రతి దశను నిర్దేశిత కాలపరిమితిలో పూర్తి చేయాలని, ఎలాంటి జాప్యానికి తావు ఇవ్వకూడదని సూచించారు. షెడ్యూల్డ్ కులాల అభివృద్ధి శాఖ ఈ ప్రక్రియకు నాయకత్వం వహించాలని భట్టి సూచించారు. సంబంధిత శాఖలు, సంస్థలకు కమిటీలో ప్రాతినిధ్యం కల్పించాలి.
న్యాయశాఖను భాగస్వామిగా చేర్చాలని, విద్యా, హోం శాఖలు, యూజీసీ వంటి సంస్థల భాగస్వామ్యాన్ని కూడా పరిశీలించాలని చెప్పారు. విద్యార్థులు, అధ్యాపకులు, న్యాయ నిపుణులు, పౌర సమాజ సంస్థలు, విద్యా రంగ నిపుణులతో చర్చలు జరిపేందుకు ముందుగా జాబితా రూపొందించాలని సూచించారు. క్షేత్రస్థాయిలో విద్యార్థులు ఎదుర్కొంటున్న సమస్యలు, ఉన్నత విద్యాసంస్థల్లో వివక్షకు సంబంధించిన అంశాలు, చట్ట అమలులో ఎదురయ్యే సవాళ్లను పరిగణనలోకి తీసుకొని ముసాయిదా సిద్ధం చేయాలని భట్టి అన్నారు.
న్యాయపరమైన, సాంకేతిక అంశాల్లో నల్సార్ న్యాయ విశ్వవిద్యాలయం సహకారం తీసుకోవాలని సూచించారు. నల్సార్ ఈ విషయంలో సహకరించడానికి అంగీకరించినట్లు షెడ్యూల్డ్ కులాల అభివృద్ధి శాఖ కార్యదర్శి విజయేంద్ర బోయి వివరించారు. 2016లో హైదరాబాద్ సెంట్రల్ యూనివర్సిటీలో పరిశోధన విద్యార్థి రోహిత్ వేముల ఆత్మహత్య చేసుకున్న సంఘటన దేశవ్యాప్తంగా చర్చనీయాంశమైంది.
కుల వివక్ష కారణంగా ఆయన ఆత్మహత్యకు పాల్పడ్డారని ఆరోపణలు వచ్చాయి. ఈ ఘటన నేపథ్యంలోనే ఉన్నత విద్యాసంస్థల్లో గుర్తింపు ఆధారిత వివక్షను నిరోధించే చట్టం అవసరమని విద్యార్థి సంఘాలు, పౌర సమాజం డిమాండ్ చేస్తూ వచ్చాయి. కాంగ్రెస్ పార్టీ 2023 అసెంబ్లీ ఎన్నికల్లో ఈ బిల్లును తీసుకురావాలని హామీ ఇచ్చింది. కర్ణాటకలో కూడా ఇలాంటి బిల్లు ముసాయిదా తయారైన నేపథ్యంలో తెలంగాణలోనూ ఈ చర్యలు వేగవంతం అవుతున్నాయి.
ఈ బిల్లు అమలులోకి వస్తే విద్యార్థులకు చట్టపరమైన రక్షణ లభిస్తుంది. వివక్ష ఘటనలపై సకాలంలో చర్యలు తీసుకునే విధానం ఏర్పడుతుంది. ప్రభుత్వం ఈ ప్రక్రియను పారదర్శకంగా, విస్తృత సంప్రదింపులతో ముందుకు తీసుకెళ్లాలని భట్టి విక్రమార్క స్పష్టం చేశారు. విద్యార్థుల భవిష్యత్తు కోసం ఇలాంటి సమగ్ర చట్టం తీసుకురావడం అవసరమని అధికార వర్గాలు భావిస్తున్నాయి.
Click it and Unblock the Notifications
Sign in with Google
