ఓటేశానని దేవుడిమీద ఒట్టెయ్.. లేదంటే డబ్బులిచ్చెయ్: షాకింగ్ వైరల్ వీడియో!

తెలంగాణ రాష్ట్రంలో 2026 మున్సిపల్ కార్పొరేషన్ ఎన్నికలలో అనేక ఆసక్తికర రాజకీయ పరిణామాలు చోటుచేసుకున్నాయి. ఈసారి మున్సిపల్ ఎన్నికలలో ప్రజలను షాక్ కు గురి చేసే అనేక వీడియోలు వైరల్ గా మారాయి. ఎన్నికలలో ఓటు వేయడానికి డబ్బులను, వస్తువులను ఇచ్చిన కొందరు ఓటు వేయని వారి నుండి తిరిగి తీసుకుంటున్న వీడియోలు సోషల్ మీడియాలో హల్చల్ చేశాయి.

డబ్బులిచ్చినా ఓటు వెయ్యని వారి లెక్క తెల్చేపనిలో అభ్యర్థులు

తాజాగా మంచిర్యాల మున్సిపల్ కార్పొరేషన్ లో 9వ డివిజన్ నుంచి పోటీ చేసిన బిజెపి అభ్యర్థి జాది తిరుపతి ఎన్నికల ఫలితాలలో ఓటమిపాలయ్యారు. ఆయన 16 ఓట్ల తేడాతో కాంగ్రెస్ అభ్యర్థితో ఓడిపోయారు. ఇక ఓటమితో తీవ్ర ఆవేదనలో ఉన్న ఆయన, ఆయన కుటుంబ సభ్యులు తమకు ఓటేస్తామని హామీ ఇచ్చి తమ వద్ద నగదు తీసుకున్న వారి లెక్క తేల్చే పనిలో పడ్డారు.

ఒట్టేసి చెప్పమని ప్రశ్న.. ఓటు వెయ్యకుంటే ఇచ్చిన డబ్బులు వసూలు

ఇంటింటికి తిరుగుతూ తమకు ఓటు వేశారా లేదా అనేది ఎంక్వయిరీ చేస్తూ, ఒట్టేసి చెప్పమని ప్రశ్నిస్తున్నారు. తమకు ఓటు వేసాము అని చెప్పిన వారిని వదిలేసి, ఓటు వేయని వారి నుండి రిటర్న్ డబ్బులు తీసుకుంటున్నారు. ఓటుకు మూడు వేల రూపాయల చొప్పున డబ్బులు ఇచ్చిన వారు తిరిగి ఆ డబ్బులను తీసుకుంటున్న వీడియో సోషల్ మీడియాలో వైరల్ గా అవుతుంది.

సోషల్ మీడియాలో వైరల్ అవుతున్న వీడియో

ఆయన భార్య రూప ప్రతి ఇంటికి వెళ్లి తన భర్త తిరుపతికి ఓటు వేశారని దేవుడిపై ప్రమాణం చేయాలని డిమాండ్ చేస్తున్న వీడియో ఒకటి సోషల్ మీడియాలో వైరల్ అవుతుంది. ఓటు వేస్తే ఒట్టేసి చెప్పండి, డబ్బులు తిరిగి ఇచ్చేయండి అని రూప డిమాండ్ చేయడం ఆ వీడియోలో ప్రధానంగా కనిపిస్తుంది. ప్రస్తుతం సోషల్ మీడియాలో వైరల్ అవుతున్న వీడియోలో వృద్ధురాలి అమాయకత్వం కొట్టొచ్చినట్టు కనిపిస్తుంది.

SWEAR ON GOD THAT YOU VOTED…
OR PAY BACK!

BJP candidate Jadi Tirupati, who lost in Mancherial Municipal Corporation Division 9, in the recently concluded Telangana Municipal polls decided that it is “pay back” time quite literally.

His wife Roopa went to every house and… pic.twitter.com/N3Uqgml75D

— Revathi (@revathitweets) February 14, 2026

డబ్బులు తిరిగి ఇచ్చిన వీడియో

ఆమె తండ్రి తిరుపతికి ఓటు వేయలేదు, కాబట్టి ఆమె వారికి చెల్లించిన రూ. 3000 తిరిగి ఇచ్చింది. తాను ఓటు వేసింది కాబట్టి ఆ డబ్బులు తిరిగి ఇవ్వలేదు. ఇక ఈ వీడియో ఓటర్లను డబ్బులతో ప్రలోభ పెడుతున్న అభ్యర్థుల తీరును, నోటుకు ఓటు అమ్ముకుంటున్న ఓటర్ల తీరును కళ్ళకు కడుతుంది.

అధికారులు దృష్టి సారిస్తారా?

ప్రభుత్వాలు ప్రజలలో ఓటు హక్కుపై చైతన్యం తీసుకురావడానికి ఎన్ని అవగాహన కార్యక్రమాలు నిర్వహించినప్పటికీ, ఇంకా ఓటర్లు ప్రలోభాలకు గురవుతూనే ఉన్నారు అని చెప్పడానికి ఈ వీడియోనే నిదర్శనం. మరి ఇటువంటి వీడియోలు బయటకు వచ్చిన తర్వాత అయినా అధికారులు వీటి పైన దృష్టి సారిస్తారా.. లేదా అన్నది తెలియాల్సి ఉంది.

English summary

video viral After losing in Mancherial Municipal Corporation Division 9, BJP candidate Jadi Tirupati allegedly asked voters to swear they voted for him — or return the money.