ప్రభూ వీళ్ళేంచేస్తున్నారో
మరొకరు బతికుండి బయటపడుతారు
చేసుకున్నోడికి చేసుకున్నంత
నీళ్ళ అవసరాన్ని ఎరువుగా వేసుకుని
పదవిలో పాతుకుపోయిన అపర భగీరథుడు
ఎండమావుల్ని వరంగా ఇచ్చి
నాలుగు రోడ్ల కూడళ్ళలో
విగ్రహమై స్థిరపడతాడు
కన్నీళ్ళ కర్థం తెలియని
రాకుమారుడు ఓదార్పు శవాన్ని
భుజానేసుకొని పట్టువదలకుండా
వెనకేసుకున్న రాళ్ళ కథలో
దోషిగా దొరికిపోతాడు
ప్రశ్నలడగడానికి అలవాటుపడ్డ భేతాళుదు
డొంకలమూలాలు తెలిసినా
తీగలాగలేక డీలా పడిపోతాడు
దేన్నైనా కొనడానికి అలవాటుపడ్డ నైజం
న్యాయమ్మీద వేలంపాటకుదిగుతుంది
లొంగినోడికి లొంగినంత మహదేవ
ముడుపులు, ఒడుపులు ముడిసరుకౌతున్న విపణిలో
దేవుడా రక్షించు న్యాయాన్ని.
అక్రమార్కా ! అక్రమార్కా !
నీ ఓదార్పుకి మాతీర్పుతో
ఋణం తీర్చుకున్నాం
మార్గం ఏదైతేనేం అది అనితర సాధ్యం
నువ్వు తరలించింది మా కాళ్ళ కింది నేలే అని
నీ అవినీతి సామ్రాజ్యం కింద మా బతుకులే మూల్గుతున్నాయని
ఏ కోర్టులు చెపితే మాకేం
మాకు మాత్రం నువ్వే దేవుడివి
కత్తులతోనో కారుణ్యంతోనో
కాలాన్ని అణిచిపెట్టటం నీకు కేకుతో పెట్టిన విద్య
దేన్నైనా కొనడానికి అలవాటుపడ్డ దాహం నీది
దేన్నైనా అమ్మడానికి వెనుకాడని దేశం మనది
ప్రజాస్వామ్యం సాక్షిగా నోటిచ్చితే ఓటేసి
నీకు పట్టం కట్టడానికి ఈ గొర్రెపిల్లలు ఎప్పుడూ సిద్దమే
నీ మరో పెట్టుబళ్ళ బలికి మా మూగ నేలా సిద్దమే
తప్పును తప్పన్నందుకే జీసస్ ని శిలువేసి
మేకులు దిగేసిన లోకం
మరోసారి నేరానికి పట్టం కట్టె వెర్రిలో
కళ్ళు మూసుకుని పరిగెత్తుతుంది
ప్రభూ వీళ్ళేంచేస్తున్నారో
వీళ్ళకే తెలియదు
బిడ్డలారా నేరం కటకటాల్లో ఉందని ఏడవకండి
న్యాయం శాశ్వతంగా గుడ్డిదౌతుందని
మీకూ మీబిడ్డలకూ దక్కకుండా పోతుందని ఏడవండి
- వఝల శివకుమార్
Click it and Unblock the Notifications
Sign in with Google