సోనియాకు జ్ఞానం లేదు: మోడీ

అమ్రేలీ (గుజరాత్): గుజరాత్ ప్రభుత్వ పనితీరుపై కాంగ్రెస్ అధ్యక్షురాలికి ఏమీ తెలియదని గుజరాత్ ముఖ్యమంత్రి నరేంద్ర మోడీ అన్నారు. కేంద్ర నిధులపై గుజరాత్ ప్రభుత్వం లెక్కలు ఇవ్వాలని సోనియా గాంధీ చేసిన డిమాండ్ పై ఆయన తీవ్రంగా ధ్వజమెత్తారు. రాష్ట్ర ప్రభుత్వ పనితీరుపై సోనియాకు కనీస జ్ఞానం కూడా లేదని ఆమె వేసిన ప్రశ్నను బట్టి అర్థమవుతోందని ఆయన ఆదివారం ఒక ఎన్నికల ర్యాలీలో అన్నారు.

కేంద్ర నిధుల వ్యయంపై తమ ప్రభుత్వం ప్రతి రెండు నెలలకు ఒకసారి కేంద్ర మంత్రిత్వ శాఖకు నివేదిక పంపుతోందని ఆయన చెప్పారు. తమను ప్రశ్నించడానికి బదులు సోనియా ఆ నివేదికలు ఎందుకు చూడరని ఆయన ప్రశ్నించారు. కాంగ్రెస్ లెక్కలను గందరగోళ పరుస్తోందని ఆయన వ్యాఖ్యానించారు. దేశాన్ని ప్రగతి పథంలో నడిపించడానికి ఎల్ కె అద్వానీని ప్రధానిని చేస్తామని ఆయన చెప్పారు.