మోహన్ బాబు 'రాజోలీ'

సమైక్యాంధ్ర ఉద్యమానికి కాల్బలాన్ని, నోటి మాటను అందించిన ప్రముఖ సినీ నటుడు మోహన్ బాబుపై తెలంగాణ ఆందోళనకారుల నుంచి తీవ్ర వ్యతిరేకత ఎదురవుతోంది. తన కుమారుడు మంచు మనోజ్ సినిమా షూటింగ్ సిబ్బందిపై తెలంగాణ ఆందోళనకారులు దాడి చేయడంతో తీవ్ర ఆగ్రహం చెందిన మోహన్ బాబు తాను తెలంగాణలో చేసిన సేవల గురించి ఏకరవు పెట్టారు. వరదలకు ఛిన్నాభిన్నమైన మహబూబ్ నగర్ జిల్లాలోని రాజోలీ గ్రామాన్ని తమ కుమారులు విష్ణువర్ధన్, మనోజ్ కుమార్ దత్తత తీసుకున్నారని చెప్పారు. ఆ ఇద్దరు నటులు రాజోలీ గ్రామాన్ని సందర్శించి, బాధితులను పరామర్శించారు. సహాయం కూడా అందించారు. ఆ గ్రామాన్ని దత్తత తీసుకుంటున్నామని చెప్పారు. అయితే దత్తత తీసుకున్న గ్రామానికి వారు అందించిన సేవ, మేలు ఏమిటనే ఆలోచన రేకెత్తడం సహజం. అదే ఆలోచనతో జీ 24 గంటల న్యూస్ ఆ గ్రామాన్ని సందర్శించి ప్రజలతో మాట్లాడించింది. ఆ వార్తాకథనంలో అసలు నిజాలు బయట పడ్డాయి.

గ్రామాన్ని దత్తత తీసుకుంటున్నామని చెప్పినప్పటికీ తమకు చేసింది ఏమీ లేదని గ్రామ ప్రజలు చెప్పారు. వరదలకు గురైన తమకు చాలా మంది సాయం చేశారని, వారందరి మాదిరిగానే మోహన్ బాబు కుమారులు తమకు సహాయం చేశారని వారు తెలిపారు. కొన్ని దప్పట్లు పంచారని వారన్నారు. అంతకు మించి తమకు చేసిందేమీ లేదని వారన్నారు. ఒక్కొక్కరికి మూడు వేల రూపాయలు, బియ్యం ఇస్తామన్నారని, కానీ ఇవ్వలేదని వారు చెప్పారు. దాదాపు 25 మంది తమకు సహాయం చేశారని, వారి లాగానే మనోజ్, విష్ణువర్ధన్ సహాయం చేశారని వారు చెప్పారు. తమకు ఆత్మాభిమానం ఉందని, ఆ ఆత్మాభిమానాన్ని దెబ్బ తీసే విధంగా మోహన్ బాబు వ్యవహరించడం సరి కాదని వారంటున్నారు.

సమైక్యవాదంతో మోహన్ బాబు ఒక్క రోజు తిరుపతిలో రిలే నిరాహార దీక్ష చేశారు. విజయవాడలో దీక్షలు చేస్తున్న తెలుగుదేశం, కాంగ్రెసు నాయకులను పరామర్శించారు. దీంతో ఆగ్రహం చెందిన తెలంగాణవాదులు మోహన్ బాబు కుమారుడు మంచు మనోజ్ కుమారుడి చిత్ర షూటింగ్ ను అడ్డుకున్నారు. మర్నాడు ప్రజారాజ్యం అధ్యక్షుడు చిరంజీవి అల్లుడు అల్లు అర్జున్ షూటింగ్ ను కూడా అడ్డుకున్నారు. దీంతో తీవ్ర ఆగ్రహం చెందిన మోహన్ బాబు తెలంగాణ ఆందోళనకారులపై, తెలంగాణ విశ్వవిద్యాలయ విద్యార్థులపై, తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రాపుపై తీవ్ర వ్యాఖ్యలు చేశారు. సవాళ్లు విసిరారు. తాను రాజోలీ గ్రామాన్ని దత్తత తీసుకున్నానని, విద్యా సంస్థల ద్వారా సేవలు చేస్తున్నానని చెప్పుకున్నారు. ఈ స్థితిలోనే జీ 24 గంటల న్యూస్ రాజోలీ గ్రామ ప్రజలతో మాట్లాడింది.