చంద్రబాబుకు తలనొప్పి, బైరెడ్డి రాయలసీమ చిచ్చు

హైదరాబాద్: తెలంగాణకు అనుకూలంగా స్పష్టమైన వైఖరి ప్రకటించడానికి సమాయత్తమవుతున్న తెలుగుదేశం పార్టీ అధ్యక్షుడు నారా చంద్రబాబునాయుడికి రాయలసీమ చిచ్చు తలనొప్పిగా మారింది. తెలంగాణకు అనుకూలంగా కేంద్రానికి లేఖ రాయాలనే చంద్రబాబు ఆలోచనను ఆ పార్టీ రాయలసీమ నేత బైరెడ్డి రాజశేఖర రెడ్డి తీవ్రంగా వ్యతిరేకిస్తున్నారు. తెలంగాణ నాయకుల ఒత్తిడికి తలొగ్గి చంద్రబాబు కేంద్రానికి లేఖ రాస్తున్నారని ఆయన విమర్శించారు. తెలంగాణపై లేఖ రాస్తే అందులో రాయలసీమ పరిస్థితిని కూడా ప్రస్తావించాలని ఆయన శనివారం మీడియా ప్రతినిధుల సమావేశంలో అన్నారు.

తెలంగాణకు అనుకూలంగా చంద్రబాబు లేఖ రాయడాన్ని తాము వ్యతిరేకిస్తున్నామని, చంద్రబాబు ఆలోచన తమకు మానసిక క్షోభ కలిగిస్తోందని ఆయన అన్నారు. తెలంగాణ రాష్ట్రం ఏర్పాటు చేస్తే రాయలసీమ పరిస్థితి ఏమిటని ఆయన ప్రశ్నించారు. తెలంగాణ రాష్ట్రం ఏర్పాటు చేస్తే రాయలసీమకు ప్రత్యేక రాష్ట్రాన్ని ఏర్పాటు చేయాల్సిందేనని బైరెడ్డి రాజశేఖర రెడ్డి అన్నారు.

రాయలసీమ పరిస్థితిపై అన్ని పార్టీలకు లేఖ రాస్తామని, ఆ లేఖను విస్మరిస్తే నాయకులు గానీ పార్టీలు గానీ ప్రజాగ్రహానికి గురి కావాల్సి ఉంటుందని ఆయన హెచ్చరించారు. రాయలసీమలో నామమాత్రంగానే కార్పోరేషన్లు ఉన్నాయని, అవన్నీ పల్లెలు మాత్రమేనని ఆయన అన్నారు. తెలంగాణ రాష్ట్రం ఏర్పాటు చేస్తే రాయలసీమ విషయాన్ని కూడా తేల్చాలని తాము కాంగ్రెసు అధ్యక్షురాలు సోనియా గాంధీకి, పిసిసి అధ్యక్షుడు బొత్స సత్యనారాయణకు కూడా లేఖలు రాస్తామని ఆయన చెప్పారు.

తెలంగాణ రాష్ట్రం ఏర్పాటువుతుందనే నమ్మకం అందరిలో ఏర్పడిందని, తాజా పరిస్థితి చూస్తుంటే తెలంగాణ వచ్చేట్లుందని ఆయన అన్నారు. రాయలసీమ నేతలకు పార్టీలు, పదవులు గోటితో సమానమని, తమకు తమ ప్రాంత ప్రయోజనాలే ముఖ్యమని ఆయన అన్నారు. ఈ నెల 26వ తేదీన రాయలసీమవాసులతో సమావేశం ఏర్పాటు చేస్తామని ఆయన చెప్పారు. తెలంగాణ అంశం 11 ఏళ్ల నుంచి మాత్రమే ఉంటే రాయలసీమ అంశం 1934 నుంచి ఉందని ఆయన చెప్పారు. రాయలసీమ సుడిగుండంలో చిక్కుకుందని ఆయన అన్నారు.

English summary

Telugudesam Rayalaseema leader Baireddy Rajasekhar Reddy has opposed his party president N Chandrababu Naidu for taking pro Telangana decision. He said that they demand statehood for Rayalaseema, if union government decides to form Telangana state.