ఉద్యోగులకు ఏపీ సర్కార్ గుడ్ న్యూస్- ఈ-ఎస్ఆర్ గడుపు పొడిగింపు..!

ఆంధ్రప్రదేశ్ లో ఉద్యోగుల సర్వీస్ రికార్డుల్ని ఆన్ లైన్ చేస్తూ తీసుకొచ్చిన ఈ-ఎస్ఆర్ లో నమోదు చేసుకోవడం, వివరాలు అప్ డేట్ చేసుకునేందుకు ఇచ్చిన గడువు ముగుస్తోంది. అయినా ఇంకా చాలా మంది ఉద్యోగులు ఈ ప్రక్రియ పూర్తి చేయలేకపోయారు. సర్వర్ సమస్యలు, ఇతరత్రా సమస్యల కారణంగా ఈ ప్రక్రియ అనుకున్న విధంగా ముందుకు సాగలేదు. దీంతో ఈ-ఎస్ఆర్ గడువు పొడిగించాలంటూ ప్రభుత్వానికి ఉద్యోగుల నుంచి విజ్ఞప్తులు వచ్చాయి. దీంతో గడువు పొడిగిస్తూ ప్రభుత్వం (AP Govt) ఇవాళ నిర్ణయం తీసుకుంది.

ఈ మేరకు ఆంధ్రప్రదేశ్ ప్రభుత్వ ఆర్థిక శాఖ ఈరోజు సర్క్యులర్ మెమో జారీ చేసింది. ఇందులో ఉద్యోగుల సర్వీస్ రికార్డుల (e-SR) నమోదు, అప్‌డేట్ ప్రక్రియ గడువును నవంబర్ 30వ తేదీ వరకూ పొడిగిస్తున్నట్లు తెలిపింది. గతంలో ఇచ్చిన ఆదేశాల ప్రకారం ఈ ప్రక్రియను 31-10-2026 నాటికి పూర్తి చేసి, 01-11-2026 నుండి అన్ని సర్వీస్ వివరాలను e-SR లో తప్పనిసరిగా నమోదు చేయాలని ఆదేశించారు. అయితే e-SR అప్లికేషన్‌లో సర్వర్ సమస్యలు, ఓటీపీ ధృవీకరణ వైఫల్యాలు వంటి సాంకేతిక ఇబ్బందులు తలెత్తాయి. దీంతో పాటు ఉద్యోగులు అవసరమైన సర్వీస్ రికార్డులు, సర్టిఫికెట్లు సమకూర్చుకోవడానికి సమయం పడుతోంది.

అలాగే కొందరు ఉద్యోగులు పంచాయతీ, పురపాలక ఎన్నికల విధుల్లో, రాష్ట్రపతి ఉత్తర్వుల కేటాయింపు ప్రక్రియల్లో నిమగ్నమై ఉన్నారు. దీంతో వీరంతా ఈ-ఎస్ఆర్ లో నమోదు లేదా అప్ డేట్ చేసుకోలేకపోయారు. ఈ నేపథ్యంలో ఏపీ సెక్రటేరియట్ అసోసియేషన్ ఈ-ఎస్ఆర్ గడువు పొడిగించాలని ప్రభుత్వానికి వినతిపత్రం సమర్పించింది. దీన్ని పరిశీలించిన ప్రభుత్వం... ఉద్యోగులు, అన్ని శాఖలు e-SR కు సంబంధించిన పూర్తి ప్రక్రియను నవంబర్ 30లోగా పూర్తి చేయాలని ఆదేశాలు ఇచ్చింది.
ఇకపై భవిష్యత్ సర్వీస్ ఈవెంట్లన్నింటినీ తప్పనిసరిగా సంబంధిత e-SR మాడ్యూల్స్ ద్వారా నమోదు చేయాల్సిన తేదీని డిసెంబర్ 1 వరకూ పొడిగించారు. ప్రభుత్వ తాజా నిర్ణయంపై ఉద్యోగులు హర్షం వ్యక్తం చేస్తున్నారు.