కేంద్ర కేబినెట్లోకి నితిన్, నితీష్..! ఆ నలుగురూ అవుట్..!

రాజ్యసభ ఎన్నికల తర్వాత కేంద్ర కేబినెట్ (Union Cabinet) విస్తరణకు రంగం సిద్దమవుతోంది. ఇప్పటికే కేబినెట్ లోకి వచ్చేది ఎవరు, నిష్కృమించేది ఎవరన్న దానిపై జాతీయ మీడియాలో పలు ఊహాగానాలు సాగుతున్నాయి. ఈ నేపథ్యంలో తాజాగా కొత్త కొత్త పేర్లు, సమీకరణాలు తెరపైకి వస్తున్నాయి. అలాగే కొన్ని ఊహించిన మార్పులు కూడా చోటు చేసుకోబోతున్నాయి. రాజ్యసభ ఎన్నికల అభ్యర్ధుల ఎంపిక దీనికి కొంత స్పష్టత ఇవ్వగా, ఎన్నికలు ముగియగానే మరింత స్పష్టత రానుంది.

రాజ్యసభ ఎన్నికల్లో ఇద్దరు కేంద్రమంత్రులకు బీజేపీ మరోసారి అవకాశం ఇవ్వలేదు. వీరిలో రవ్ నీత్ సింగ్ బిట్టూ, జార్జ్ కురియన్ ఉన్నారు. దీంతో వీరిద్దరినీ సాగనంపడం ఖాయమని తేలిపోయింది. అలాగే వీరితో పాటు మరో ఇద్దరు మంత్రులు పంకజ్ చౌదరి, హర్ష్ మల్హోత్రాకు కూడా ఉద్వాసన తప్పేలా లేదు. వీరిలో హర్ష్ మల్హోత్రాను బీజేపీ ఢిల్లీ అధ్యక్షుడిగా పంపబోతున్నారు. అలాగే పంకజ్ చౌదరిని యూపీ బీజేపీ అధ్యక్షుడిగా పంపుతున్నారు. ఈ లెక్కన నలుగురు కేంద్రమంత్రుల్ని తప్పించడం ఖాయమైంది.

వీరి స్ధానాల్లో ఎంపిక చేసే వారిలో రెండు పేర్లపై క్లారిటీ వచ్చింది. ఆ ఇద్దరిలో ఒకరు బీజేపీ జాతీయ అధ్యక్షుడిగా ఎంపికైన బీహార్ నేత నితిన్ నబిన్ (Nitin Nabin), అలాగే కేంద్రంలోకి తెచ్చేందుకు బీజేపీ వ్యూహాత్మకంగా బీహార్ సీఎం పదవి నుంచి తప్పించిన నితీష్ కుమార్ (nitish kumar). వీరిద్దరినీ కచ్చితంగా కేబినెట్లోకి తీసుకోబోతున్నారు. వీరికి కీలక శాఖలు కూడా అప్పగించబోతున్నట్లు సమాచారం. వీరితో పాటు మరికొన్ని పేర్లపైనా మోడీ-షా ద్వయం ప్రస్తుతం కసరత్తు చేస్తున్నట్లు తెలుస్తోంది. అతి త్వరలో వీటిపై క్లారిటీ రానుంది. ఏపీ నుంచి మరో కూటమి ఎంపీకి కేంద్రమంత్రిగా అవకాశం కల్పిస్తారని చర్చ జరుగుతున్నా ఇంకా ఫైనల్ కాలేదు.