మేడ్చల్లో బయటపడ్డ ఉగ్రలింకులు.. పాక్ ముఠాకు మంత్రుల వివరాలు చేరవేత!
హైదరాబాద్లోని మేడ్చల్ ప్రాంతంలో మరోసారి ఉగ్రవాద కుట్రలు బయటపడ్డాయి. మేడ్చల్ పోలీసులు 22 ఏళ్ల హోటల్ వెయిటర్ జయీద్ ఖాన్ అలియాస్ ఆదిల్ ఖాన్ ను అరెస్టు చేశారు. ఇతడు పాకిస్థాన్లోని గ్యాంగ్స్టర్-ఉగ్రవాది షెహజాద్ భట్టి ముఠాతో సంప్రదింపులు జరిపి, దేశ వ్యతిరేక కార్యకలాపాల్లో పాల్గొన్నట్లు పోలీసులు గుర్తించారు.
పాకిస్థాన్ గ్యాంగ్స్టర్ తో మేడ్చల్ హోటల్ వెయిటర్ సంప్రదింపులు
జయీద్ ఖాన్ ఉత్తరప్రదేశ్లోని ఘజియాబాద్కు చెందినవాడు. ఫిబ్రవరి 2026 నుంచి మేడ్చల్లోని ఒక హోటల్లో వెయిటర్గా పని చేస్తున్నాడు. నాలుగోతరగతి వరకు మాత్రమే చదువుకున్న ఇతడు 2021 నుంచి ఇన్స్టాగ్రామ్లో యాక్టివ్గా ఉంటూ, టాయ్ పిస్టల్తో వీడియోలు పోస్ట్ చేస్తూ సోషల్ మీడియా ఫాలోయింగ్ పెంచుకున్నాడు. ఈ క్రమంలో 2026 జనవరిలో పాకిస్థాన్ గ్యాంగ్స్టర్ షెహజాద్ భట్టి అనుచరులైన అబిద్ జట్, రాణా హుస్సేన్లతో ఇన్స్టాగ్రామ్ ద్వారా సంప్రదింపులు ప్రారంభించాడు.
వాట్సాప్ చాట్లు, కాల్ రికార్డులతో దర్యాప్తు
పోలీసుల విచారణలో తేలిన విషయాల ప్రకారం, షెహజాద్ భట్టి ముఠా సభ్యులు జయీద్ను ఉత్తరప్రదేశ్ ముఖ్యమంత్రి యోగి ఆదిత్యనాథ్ వ్యక్తిగత సహాయకుడి ఫోన్ నంబర్ ఇవ్వాలని కోరారు. అయితే జయీద్ బహిరంగంగా అందుబాటులో ఉన్న యూపీ క్యాబినెట్ మంత్రుల ఫోన్ నంబర్లు, ఈమెయిల్ ఐడీలను వారికి పంపాడు. దానికి బదులుగా తనకు ఆయుధాలు సరఫరా చేయాలని కోరినట్లు వాట్సాప్ చాట్లు, కాల్ రికార్డుల ద్వారా బయటపడింది.
ఉగ్రవాద మూకతో సంబంధాలు ఉన్నట్టు అనుమానాలు
షెహజాద్ భట్టికి పాకిస్థాన్ ISI మరియు తెహ్రీక్-ఎ-తాలిబన్-ఎ-హిందుస్థాన్తో సంబంధాలు ఉన్నట్లు నిఘా వర్గాలు అనుమానిస్తున్నాయి. ఈ కేసులో మే 23న జయీద్ ఖాన్ను అరెస్టు చేసిన పోలీసులు BNS సెక్షన్ 152 (దేశ వ్యతిరేక కార్యకలాపాలు) మరియు సెక్షన్ 61(2) కింద కేసు నమోదు చేశారు. ప్రస్తుతం జ్యుడీషియల్ రిమాండ్లో ఉన్న జయీద్ను ఇంటెలిజెన్స్ అధికారులు కూడా లోతుగా విచారిస్తున్నారు.
మేడ్చల్ లో బయటపడ్డ ఉగ్ర లింకులు
హైదరాబాద్లో ఇలాంటి ఉగ్రవాద లింకులు బయటపడడం రాష్ట్ర భద్రతా యంత్రాంగానికి సవాలుగా మారింది. జయీద్ ఖాన్ ఒక సామాన్య హోటల్ ఉద్యోగిగా ఉంటూ ఎలా ఉగ్రవాద ముఠాలతో చేతులు కలిపాడనేది ప్రస్తుతం ఆసక్తికరంగా మారింది. ఈ కేసులో ఎవరెవరికి సంబంధాలు ఉన్నాయో బయటపెట్టే అవకాశం ఉంది.తెలంగాణలో ఉగ్రవాద ఘటనలు పెరుగుతున్న నేపథ్యంలో పోలీసు శాఖ మరింత అప్రమత్తంగా ఉండాలని రాజకీయ నాయకులు, భద్రతా నిపుణులు సూచిస్తున్నారు.
Click it and Unblock the Notifications
Sign in with Google