"కోడిగుడ్డు పప్పు " ఎప్పుడైనా ట్రై చేశారా ???

తెలుగు రాష్ట్రాల్లోనే కాకుండా దేశవ్యాప్తంగా ప్రాచుర్యం పొందిన సాంప్రదాయ వంటకం "పప్పు". పప్పు ఆరోగ్యానికి ఎంతో మేలు చేస్తుంది. ఇందులో ఉండే ఐరన్, కాల్షియం, ప్రొటీన్లు శరీరానికి అవసరమైన పోషకాలను సమృద్ధిగా ఉంటాయి. సాదాసీదా పదార్థాలతో తయారవుతూనే, అత్యద్భుతమైన రుచిని అందించే ఈ వంటకం కుటుంబంలో చిన్నవారికి, పెద్దవారికి సమానంగా ఇష్టమవుతుంది. అయితే పప్పులో పలు రకాలు ఉంటాయి.

మరి ముఖ్యంగా కోడిగుడ్డు పప్పు (Egg Dal) అనేది సాధారణ పప్పుకు కొత్త రుచి తీసుకొచ్చే ప్రత్యేకమైన వంటకం. అన్నంతోనూ, రోటీ, చపాతీతోనూ అద్భుతంగా కుదిరే ఈ కర్రీ ప్రోటీన్‌ పరంగా కూడా చాలా మంచిది. ముఖ్యంగా పిల్లలకు, గుడ్డు ఇష్టపడేవారికి ఇది బెస్ట్ ఆప్షన్. తక్కువ సమయంలో, సులభంగా ఇంట్లోనే తయారు చేసుకునే ఈ కోడిగుడ్డు పప్పు రెసిపీ మీకోసం ప్రత్యేకంగా..

కావలసిన పదార్థాలు:

కందిపప్పు - 1 కప్పు

కోడిగుడ్లు - 3 లేదా 4 (ఉడకబెట్టినవి)

ఉల్లిపాయ - 1 (సన్నగా తరుగు)

టమోటాలు - 2 (తరుగు)

పచ్చిమిర్చి - 3 (నిలువుగా చీల్చినవి)

అల్లం వెల్లుల్లి పేస్ట్ - 1 టీస్పూన్

కారం - రుచికి తగినంత

పసుపు - పావు టీస్పూన్

ఉప్పు - అవసరమైనంత

నూనె - 3-4 టేబుల్ స్పూన్లు

పోపుకు కావలసినవి:

ఆవాలు - పావు టీస్పూన్

జీలకర్ర - పావు టీస్పూన్

ఎండు మిర్చి - 2

కరివేపాకు - కొద్దిగా

కొత్తిమీర - అలంకరణకు

తయారీ విధానం:

ముందుగా కందిపప్పును బాగా కడిగి, కుక్కర్‌లో సరిపడా నీళ్లు, కొద్దిగా పసుపు వేసి 4-5 విజిల్స్ వచ్చే వరకు మెత్తగా ఉడికించుకోవాలి.

ఉడికిన పప్పును గుత్తితో కొద్దిగా మెదిపి పక్కన పెట్టాలి.

ఇప్పుడు కోడిగుడ్లను ఉడకబెట్టి పొట్టు తీసి, మధ్యలో లేదా చుట్టూ చిన్న గాట్లు పెట్టాలి.

ఒక పాన్‌లో కొద్దిగా నూనె వేడి చేసి, గుడ్లపై కొద్దిగా ఉప్పు, కారం చల్లి లేతగా దోరగా వేయించి పక్కన పెట్టుకోవాలి.

ఇలా వేయించడం వల్ల గుడ్లు పప్పులో వేసినప్పుడు మరింత రుచిగా ఉంటాయి.
తర్వాత ఒక బాణలిలో నూనె వేడి చేసి, ఆవాలు, జీలకర్ర వేసి చిటపటలాడనివ్వాలి.

ఆపై ఎండు మిర్చి, కరివేపాకు వేసి వాసన రాగానే ఉల్లిపాయ తరుగు, పచ్చిమిర్చి వేసి బంగారు రంగు వచ్చే వరకు వేయించాలి.

అల్లం వెల్లుల్లి పేస్ట్ వేసి పచ్చి వాసన పోయే వరకు మగ్గించాలి.

ఇందులో టమోటా ముక్కలు వేసి పూర్తిగా మెత్తబడే వరకు ఉడికించాలి.

టమోటాలు బాగా మగ్గిన తర్వాత ఉప్పు, కారం, పసుపు వేసి మసాలా నూనె విడిచే వరకు కలుపుతూ వేయించాలి.

ఇప్పుడు ముందుగా ఉడికించి పెట్టుకున్న కందిపప్పును ఇందులో వేసి బాగా కలపాలి.

పప్పు గట్టిగా ఉంటే కొద్దిగా వేడి నీళ్లు పోసుకుని మరిగించాలి.

చివరగా వేయించి పెట్టుకున్న కోడిగుడ్లను పప్పులో వేసి, చిన్న మంటపై 5 నిమిషాల పాటు ఉడికించాలి. దీంతో గుడ్లలోకి పప్పు మసాలా రుచి బాగా పడుతుంది.

స్టవ్ ఆపే ముందు కొత్తిమీర చల్లి, ఒకసారి కలిపి దించేయాలి.

అంతే... వేడివేడి, రుచికరమైన కోడిగుడ్డు పప్పు సిద్ధం!

సర్వింగ్ సూచనలు..

ఈ కోడిగుడ్డు పప్పు అన్నంతో అయితే నెయ్యి వేసుకుని తింటే అదిరిపోయే రుచి వస్తుంది. రోటీ, చపాతీ, జీరా రైస్ లేదా సాదా రైస్‌తో కూడా అద్భుతంగా కుదురుతుంది. రోజువారీ పప్పుకు భిన్నంగా, కొంచెం స్పెషల్‌గా ట్రై చేయాలంటే ఈ రెసిపీ తప్పకుండా ప్రయత్నించండి.

English summary

Pappu is a traditional dish that has been popular not only in the Telugu states but also across the country for generations. While there are many varieties of pappu, one of them is egg dal. egg is very good for health.