యస్పీ ముందు లొంగిపోయిన గౌరు వెంకటరెడ్డి

కర్నూలు: కాంగ్రెస్‌ శాసనసభ్యురాలు గౌరు చరితారెడ్డి భర్త గౌరు వెంకటరెడ్డి బుధవారం మధ్యాహ్నం కర్నూలు జిల్లా పోలీసు సూపరింటిండెంట్‌ ముందు లొంగిపోయారు. జంట హత్య కేసులో శిక్ష పడిన వెంకటరెడ్డికి రాష్ట్ర ప్రభుత్వం ప్రసాదించిన క్షమాభిక్షను సుప్రీంకోర్టు రద్దు చేసింది. అంతేకాకుండా లొంగిపోవడానికి గడువు కోరిన వెంకటరెడ్డి విజ్ఞప్తిని కూడా త్రోసిపుచ్చుతూ వెంటనే లొంగిపోవాలని మంగళవారంనాడు ఆదేశించింది. దీంతో ఆయన లొంగిపోవాల్సిన అనివార్యత ఏర్పడింది. ఈ నేపథ్యంలోనే ఆయన జిల్లా యస్పీ ముందు లొంగిపోయారు.

యస్పీ ముందు లొంగిపోవడానికి తన సొంత వూరు బ్రాహ్మణ కొట్కూరు నుంచి బయలుదేరి కర్నూలు చేరుకోవడంలో బోలెడు నాటకీయత చోటు చేసుకుంది. ఆయన బ్రాహ్మణకొట్కూరు నుంచి బుధవారం ఉదయం బయలుదేరారు. మూడు వాహనాల ద్వారా ఆయన ప్రయాణం సాగింది. స్థానిక మీడియా ప్రతినిధులను తప్పించుకుని ఆయన కర్నూలుకు బయలుదేరారు. లొంగిపోయే ముందు తాను మీడియా ప్రతినిధులను కలుస్తానని ఆయన మంగళవారంనాడు అన్నారు. అయితే దాన్ని ఆయన నిలబెట్టుకోలేదు.