కోదండరామ్‌తో విభేదించిన కిషన్ రెడ్డి, డి. శ్రీనివాస్‌పై ఆగ్రహం

By Srinivas

Published: Wednesday, March 16, 2011, 12:52 [IST]

హైదరాబాద్: భారతీయ జనతా పార్టీతో తెలంగాణ రాష్ట్ర సమితి అధ్యక్షుడు కె చంద్రశేఖరరావు కలవడాన్ని ప్రదేశ్ కాంగ్రెస్ కమిటీ ఆధ్యక్షుడు ప్రశ్నించడాన్ని బిజెపి రాష్ట్ర అధ్యక్షుడు కిషన్‌రెడ్డి బుధవారం అసెంబ్లీ మీడియా పాయింట్ వద్ద మాట్లాడుతూ తప్పుపట్టారు. అనారోగ్యం వస్తే మనుషుల డాక్టర్ వద్దకు వెళితే ఫలితం ఉంటుందని కానీ పశువుల డాక్టర్ దగ్గరకు వెళితే ఫలితం ఉండదని అలాగే కెసిఆర్ తెలంగాణకు అనుకూలంగా ఉన్న బిజెపితో కలిసి వస్తున్నారని అన్నారు. కాంగ్రెస్ తెలంగాణ అంశంపై తేల్చేతే బాగుంటుందన్నారు. బిజెపితో కెసిఆర్ భేటీని తప్పు పడుతున్న డిఎస్ మండలి ఎన్నికల కోసం కాంగ్రెస్ మా మద్దతు తీసుకున్నప్పడు ఆ విషయం గుర్తుకు రాలేదా అని ప్రశ్నించారు.

తెలంగాణ అంశంపై ప్రధానమంత్రి మన్మోహన్ సింగ్ మన్నుతిన్న పాములా వ్యవహరిస్తున్నారన్నారు. అసెంబ్లీకి పిండ ప్రధానం చేస్తామన్న తెలంగాణ రాజకీయ ఐక్య కార్యాచరణ సమితి చైర్మన్ కోదండరామ్ వ్యాఖ్యలతో తాను విభేదిస్తున్నట్లు చెప్పారు. కాగా కిషన్‌రెడ్డి ప్రభుత్వంపై కూడా విరుచుకు పడ్డారు. రాష్ట్రంలోని అన్ని సమస్యలను పరిష్కరించకుండా ఉండడానికే సమావేశాలను వాయిదా వేస్తుందన్నారు. ఉషామెహ్రా కమిషన్, ప్రాణహిత-చేవెళ్ల, పోలవరం ప్రాజెక్టుల జాతీయ హోదా, అకాల వర్షాలు, తుఫానులతో సుమారు 15 జిల్లాల్లో నష్టపోయిన రైతులు, ఉద్యమంలో పాల్గొన్న విద్యార్థుల కేసుల ఎత్తివేత తదితర విషయాలపై చర్చకు రాకుండానే స్పీకర్ సమావేశాలను వాయిదా వేస్తూ వస్తున్నారన్నారు. అసెంబ్లీ పిండ ప్రదానానికి తాము హాజరు కాబోమని ఆయన చెప్పారు.

Published On March 16, 2011