బోర్డు తిప్పేసిన మరో సాఫ్టువేర్ సంస్థ టాస్క్ ఇన్ఫర్మేటిక్స్

By Srinivas

Published: Monday, May 28, 2012, 18:58 [IST]

హైదరాబాద్: రాష్ట్ర రాజధాని హైదరాబాదులో మరో సాఫ్టువేర్ సంస్థ బోర్డు తిప్పేసింది. ఇటీవల పది రోజుల వ్యవధిలో హైటెక్ సిటీ పరిసరాల్లో ప్రోడ్జితో సహా మరో సాఫ్టువేర్ సంస్థ బోర్డు తిప్పేసిన విషయం తెలిసిందే. తాజాగా టాస్క్ ఇన్ఫర్మేటిక్స్ అనే సంస్థ బోర్డు తిప్పేసింది. మాదాపూర్ అరుణోదయ కాలనీలో టాస్క్ ఇన్ఫర్మేటిక్స్ సంస్థ ఐదు నెలల క్రితం ఏర్పాటైంది. ఈ సంస్థ నిరుద్యోగ యువతను లక్ష్యంగా చేసుకొని ఉద్యోగాల పేరుతో ఎర వేసి ఒక్కొక్కరి నుండి సుమారు రూ.40వేల నుండి రూ.70వేల రూపాయలు వసూలు చేసింది.

ఈ సంస్థకు సిఇవోనని చెప్పుకుంటున్న పునీత్, ఎండి షేక్ అలీషాలు సుమారు 250 మంది నిరుద్యోగుల నుండి రూ.కోటి వసూలు చేశారు. మూడు నెలలుగా ఉద్యోగులకు జీతాలు ఇవ్వకుండా వేధిస్తుండటంతో ఆగ్రహానికి గురైన ఉద్యోగులు షేక్ అలీషాను గదిలో నిర్బంధించి కార్యాలయంలో ఫర్నిచర్ ధ్వంసం చేశారు. బాధితులు మాదాపూర్ పోలీసులను ఆశ్రయించారు. పునీత్, అలీషాపై పోలీసులు కేసు నమోదు చేసుకొని దర్యాఫ్తు చేస్తున్నారు. సిఇవోను అరెస్టు చేసినట్లుగా తెలుస్తోంది.

Published On May 28, 2012