ఇందుకే చేయి కలిపా: 7భాషల్లో కేజ్రీవాల్, తెలుగులో

By Srinivas

Updated: Tuesday, December 24, 2013, 16:28 [IST]

న్యూఢిల్లీ: ఢిల్లీలో కొత్త ప్రభుత్వాన్ని ఏర్పాటు చేసేందుకు తాము కాంగ్రెసు పార్టీ మద్దతును ఎందుకు తీసుకున్నామో అరవింద్ కేజ్రీవాల్ నేతృత్వంలోని ఆమ్ ఆద్మీ పార్టీ(ఎఎపి) ఇంటర్నెట్లో ఏడు భాషల్లో వివరించింది. ఎఎపి మంగళవారం యూ ట్యూబ్‌లో ఓ వీడియోను విడుదల చేసింది.

కాంగ్రెసు, బిజెపిల మద్దతు తీసుకోమని, మళ్లీ ఎన్నికలకు సిద్ధమని ప్రకటించిన తాము కాంగ్రెసు పార్టీ మద్దతును ఎందుకు తీసుకున్నామో చెప్పే ప్రయత్నం చేసింది. ఈ వీడియో తమిళం, కన్నడ, తెలుగు, హిందీ, మలయాళం, మరాఠీ, ఆంగ్ల భాషలలో ఉంది. రెండు రోజుల క్రితం అప్‌లోడ్ ఇది బాగా షేర్ అవుతోంది.

తాము ప్రభుత్వం ఏర్పాటు చేయాలా అని ప్రజలను అడిగితే రెండు సమాధానాలు వచ్చాయన్నారు. ఒకటి కాంగ్రెసు, బిజెపిలకు దూరంగా ఉండమని, రెండోది ప్రభుత్వం ఏర్పాటు చేసి, ఇచ్చిన హామీలు నెరవేర్చాలని సమాధానాలు వచ్చాయన్నారు. ఇప్పటికీ తమది మైనార్టీ ప్రభుత్వమేనని, కాంగ్రెసు, బిజెపిలు ప్రతిపక్షంలోనే ఉన్నాయని చెప్పారు.

ఎఎపి ప్రభుత్వంలో కాంగ్రెసు పార్టీకి ఎలాంటి మంత్రి పదవులు ఉండవని, ఆ పార్టీ బయటి నుండే మద్దతిస్తుందని చెప్పారు. అవినీతిపై రాజీపడమని, ప్రభుత్వాన్ని ఏర్పాటు చేస్తున్నామన్నారు. ఎన్నికల హామీలను అమలుపరుస్తామని చెప్పారు. రెండు వారాల్లో లోక్‌పాల్ బిల్లు ప్రవేశ పెడతామన్నారు.