సహజీవనం చేస్తే జరిమానా.. బిడ్డ పుడితే ఫైన్! ఈ వింత గ్రామం రూల్స్ తెలిస్తే షాకవ్వాల్సిందే!

సాధారణంగా గ్రామ అభివృద్ధి కోసం కమిటీలు కొన్ని నిబంధనలు పెడుతుంటాయి. చైనాలోని యునాన్ ప్రావిన్స్‌కు చెందిన ఓ చిన్న గ్రామం వింతైన, కఠినమైన రూల్స్ పెట్టుకుని వార్తల్లో నిలిచింది. చైనాలోని లింకాంగ్ అనే గ్రామంలో ఏకంగా ప్రజల వ్యక్తిగత జీవితాలపై ఆంక్షలు విధిస్తూ నోటీసు జారీ చేసింది. "గ్రామ నియమాలు: అందరూ సమానమే" పేరుతో వెలువడిన ఈ నిబంధనల జాబితా నెటిజన్లను విస్మయానికి గురిచేస్తోంది.

జరిమానాల చిట్టా ఇదే..

సౌత్ చైనా మార్నింగ్ పోస్ట్ నివేదిక ప్రకారం, ఈ గ్రామంలో ఎవరైనా నిబంధనలు అతిక్రమిస్తే కింది విధంగా జరిమానాలు చెల్లించాల్సి ఉంటుంది.

*సహజీవనం: పెళ్లి చేసుకోకుండా కలిసి నివసించే జంటలకు ఏడాదికి 500 యువాన్లు (సుమారు రూ. 5,800) జరిమానా.

*ముందస్తు గర్భం: వివాహానికి ముందే గర్భిణీ అయితే 3,000 యువాన్లు (సుమారు రూ. 35,000) చెల్లించాలి.

*తొందరగా బిడ్డ పుడితే: పెళ్లయిన 10 నెలల లోపే బిడ్డ పుడితే, ఆ తల్లిదండ్రులు 3,000 యువాన్ల జరిమానా కట్టాలి.

*ఇతర రాష్ట్రం వాళ్లను పెళ్లి చేసుకుంటే: యునాన్ ప్రావిన్స్ కాకుండా ఇతర ప్రావిన్ల్ వాళ్లను పెళ్లి చేసుకుంటే 1,500 యువాన్ల జరిమానా కట్టాల్సి ఉంటుంది.

*భార్యాభర్తలు గొడవలు పడితే: భార్యాభర్తలు గొడవపడి, ఆ సమస్య పరిష్కారానికి గ్రామ అధికారులను పిలిస్తే, ఒక్కొక్కరు 500 యువాన్లు చెల్లించాలి.

*వదంతులు వ్యాపింపజేస్తే: గ్రామంలో పుకార్లు పుట్టించినా లేదా తప్పుడు ఆరోపణలు చేసినా 500 నుండి 1,000 యువాన్ల వరకు జరిమానా విధిస్తారు.

ప్రభుత్వం స్పందన
ఈ వింత నిబంధనల ఫోటోలు సోషల్ మీడియాలో వైరల్ కావడంతో చైనా ప్రభుత్వంపై విమర్శలు వెల్లువెత్తాయి. దీనిపై స్పందించిన మెంగ్‌డింగ్ టౌన్ ప్రభుత్వం, ఈ నిబంధనలు "చాలా అసాధారణంగా" ఉన్నాయని అంగీకరించింది. గ్రామ కమిటీ స్వయంగా ఎవరి అనుమతి లేకుండా ఈ నోటీసును అతికించిందని, ప్రస్తుతం దానిని తొలగించామని అధికారులు వెల్లడించారు.

English summary

A small village in China’s Yunnan province has gone viral for imposing strict fines on live-in relationships, premarital pregnancy, early childbirth, and even marital disputes.