ఆసక్తికరంగా టీ20 కెప్టెన్సీ రేసు..! గిల్ తో పాటు ఆ లెఫ్ట్ హ్యాండర్- అతనికి గంభీర్ బ్రేక్ ?

ఈ ఏడాది టీ20 వరల్డ్ కప్ ను భారత్ కు అందించిన సూర్యకుమార్ యాదవ్ తాజాగా ఫామ్ కోల్పోవడం, ఐపీఎల్ ప్రదర్శనల తర్వాత అతని వారసుడిని ఎంపిక చేయక తప్పని పరిస్ధితి బీసీసీఐకి ఎదురవుతోంది. ఈ నేపథ్యంలో సూర్యను కెప్టెన్సీ నుంచి తప్పించి అతని స్ధానంలో మరో కొత్త కెప్టెన్ కు పగ్గాలు అప్పగించేందుకు బోర్డు కసరత్తు చేస్తోంది. ఇందులో భాగంగా పలు కొత్త పేర్లు తెరపైకి వస్తున్నాయి. ఇందులో ఒకరిని త్వరలో ఎంపిక చేయబోతున్నారు.

సూర్యను తప్పిస్తే అతని స్ధానంలో టీమిండియా టీ20 కెప్టెన్ గా (India T20I Captaincy) శ్రేయస్ అయ్యర్, శుభ్‌మన్ గిల్, తిలక్ వర్మ పేర్లను పరిశీలిస్తున్నట్లు సమాచారం. రెండేళ్లుగా సూర్య ఫామ్ పేలవంగా ఉండటం, అప్పుడప్పుడు ఆడే నాణ్యమైన ఇన్నింగ్స్‌లు మినహా, అంతర్జాతీయ మ్యాచ్‌లు, ఐపీఎల్‌లో సూర్యకుమార్ సగటు 20లలోపే ఉంది. దీంతో కొత్త టీ20 కెప్టెన్ కోసం బీసీసీఐ వెతుకుతోంది. ఇందులో శ్రేయస్ ఒక బలమైన పోటీదారుడుగా ఉన్నా.. అతనికి తుది అవకాశం దక్కుతుందా లేదా అనేది హెడ్ కోచ్ గౌతమ్ గంభీర్‌పై ఆధారపడి ఉంటుందని తెలుస్తోంది. కెప్టెన్సీ ఎంపికలో గంభీర్‌దే తుది నిర్ణయం అని, అయ్యర్‌తో అతని సంబంధాల్లో అనిశ్చితి నెలకొని ఉందని పీటీఐ నివేదిక పేర్కొంది.

ఐపీఎల్ 2024 విజయంలో జట్టు మెంటార్ గంభీర్‌కే ఎక్కువ క్రెడిట్ దక్కడం పట్ల అప్పటి కోల్‌కతా నైట్ రైడర్స్ కెప్టెన్ శ్రేయస్ నిరాశ చెందాడని తెలుస్తోంది. కాబట్టి, పరిశీలనలో ఉన్న ఇతర ఎంపికల్లో శుభ్‌మన్ గిల్, తిలక్ వర్మ ఉన్నారు. ఐపీఎల్ 2026లో టాప్ టూలో నిలిచిన గుజరాత్ టైటాన్స్‌తో గిల్ సాధించిన విజయాల కారణంగా అతని ప్రాభవం పెరుగుతోందని ఆ నివేదిక పేర్కొంది. 2026 పురుషుల టీ20 ప్రపంచకప్‌కు ముందు టీ20లలో పేలవ ప్రదర్శన ఆ ప్రణాళికలను మార్చడానికి ముందు, అన్ని ఫార్మాట్ల కెప్టెన్‌గా చీఫ్ సెలెక్టర్ అజిత్ అగార్కర్ మొదటి ఎంపిక అతనేనని చెబుతున్నారు.

సూర్యకుమార్‌ను తొలగిస్తే ఓపెనింగ్ స్థానంలోకి తిరిగి వచ్చే అవకాశం గిల్‌కు ఉంటుందని, ఆ తర్వాత సంజు సామ్సన్ మూడో స్థానానికి, ఇషాన్ కిషన్ నాలుగో స్థానానికి వెళ్తారని భావిస్తున్నారు. ముంబై ఇండియన్స్ తరఫున తిలక్ ఫామ్ నిలకడగా లేనప్పటికీ, అతని పేరు కూడా తీవ్రంగా వినిపిస్తోంది. మూడు దేశాల సిరీస్ కు తిలక్ ను కెప్టెన్ గా నియమించడమే దీనికి కారణం. అక్కడ సెలెక్టర్లు అతని నాయకత్వ నైపుణ్యాలను చూసే అవకాశం ఉంటుందని తెలుస్తోంది.