ఎన్టీఆర్ తో బాబు మంతనాలు

హైదరాబాద్: ప్రమాదంలో గాయపడి ఇంట్లో విశ్రాంతి తీసుకుంటున్న సినీ నటుడు జూనయర్ ఎన్టీఆర్ ను తెలుగుదేశం పార్టీ అధ్యక్షుడు నారా చంద్రబాబు నాయుడు శుక్రవారంనాడు పరామర్శించారు. చంద్రబాబు జూనియర్ ఎన్టీఆర్ నివాసానికి వెళ్లి దాదాపు 40 నిమిషాలు ఆయనతో గడిపారు. తెలుగుదేశం పార్టీ విజయానికి ప్రచారం చేసినందుకు చంద్రబాబు జూనియర్ ఎన్టీఆర్ కు అభినందనలు తెలియజేశారు. టీవీ చానెళ్ల ద్వారా ప్రజలనుద్దేశించి జూనియర్ ఎన్టీఆర్ చేసిన ప్రసంగాల వల్ల తెలుగుదేశం విజయావకాశాలు మెరుగు పడ్డాయని చంద్రబాబు తెలియజేశారు. పార్టీ పరిస్థితి గురించి, పార్టీ విజయావకాశాల గురించి చంద్రబాబు జూనియర్ ఎన్టీఆర్ కు వివరించారు. బాబాయ్ బాలకృష్ణ గురువారం జూనియర్ ఎన్టీఆర్ ను పరామర్శించారు.

జూనియర్ ఎన్టీఆర్ తొలి దశ పోలింగ్ కు ముందు ఒక్కసారి, తుది దశ పోలింగ్ కు ముందు మరోసారి టీవీ చానెళ్ల ద్వారా ప్రజలనుద్దేశించి ప్రసంగించారు. ఆయన ఉత్తరాంధ్రలోనూ, ఖమ్మం జిల్లాలోనూ విస్తృతంగా పర్యటించారు. ఖమ్మం జిల్లాలో పర్యటనను ముగించుకుని వస్తుండగా నల్లగొండ జిల్లాలో జరిగిన రోడ్డు ప్రమాదంలో జూనియర్ ఎన్టీఆర్ తీవ్రంగా గాయపడ్డారు. కిమ్స్ లో చికిత్స పొందిన ఆయన ప్రస్తుతం ఇంట్లో విశ్రాంతి తీసుకుంటున్నారు.