గాంధీ పేరుతో గుర్తించవద్దు: వరుణ్

ఖాగా (ఉత్తరప్రదేశ్): తనను తన పేరులోని గాంధీ పదంతో గుర్తించవద్దని, తన సేవలతో గుర్తించాలని భారతీయ జనతా పార్టీ (బిజెపి) ఫిలిభిత్ అభ్యర్థి వరుణ్ గాంధీ అన్నారు. గాంధీ కుటుంబం నుంచి వచ్చినందుకు ఎలాంటి భావనకు గురవుతున్నారని తనను అడుగుతుంటారని, తనను తన పేరుతో గుర్తించవద్దని, తాను చేసే పనితో గుర్తించాలని ఆయన అన్నారు. జైలు నుంచి విడుదలైన తర్వాత ఆయన ఆదివారం తొలిసారి ఎన్నికల ర్యాలీలో ప్రసంగించారు.

కులాలకు అతీతంగా ఓటు వేయాలని ఆయన ప్రజలను కోరారు. ఉత్తరప్రదేశ్ ప్రభుత్వంపై ఆయన తీవ్రంగా ధ్వజమెత్తారు. కులాల ప్రాతిపదికపై ఓటు వేస్తారో, దేశభక్తి విలువలకు ఓటేస్తారో ఉత్తరప్రదేశ్ ప్రజలు తేల్చుకోవాల్సిన సమయం వచ్చిందని ఆయన అన్నారు. జైల్లో తనను ఒంటరిగా ఉంచారని ఆయన చెప్పారు.