నాగంపై దాడి: శ్రీకాంత్ రాజు అరెస్టు

హైదరాబాద్: తెలుగుదేశం నాయకుడు నాగం జనార్దన్ రెడ్డిపై ఉస్మానియా విశ్వవిద్యాలయంలో దాడి చేసిన కేసులో పోలీసులు శ్రీకాంత్ రాజు అనే వ్యక్తిని అరెస్టు చేశారు. దాడికి సంబంధించి టీవీల్లో ప్రసారమైన వీడియో క్లిప్పింగుల ఆధారంగా నిందితులపై పోలీసులు కేసు నమోదు చేశారు. ఉస్మానియా విశ్వవిద్యాలయంలో తెలంగాణ విద్యార్థులకు సంఘీభావం తెలపడానికి వెళ్లిన నాగం జనార్దన్ రెడ్డిపై ఇటీవల పెద్ద యెత్తున దాడి జరిగింది. ఈ దాడి కేసును రాష్ట్రప్రభుత్వం సిఐడికి అప్పగించారు. వెంటనే సిఐడి పోలీసులు దర్యాప్తు ప్రారంభించారు.

నల్లగొండ జిల్లా మాసిరెడ్డిపల్లి గ్రామానికి చెందిన రౌడీ షీటర్ శ్రీకాంత్ రాజు, హైదరాబాదులోని నాంపల్లి క్రిమినల్ కోర్టులో న్యాయవాదిగా పనిచేస్తున్న మహబూబ్ నగర్ జిల్లా పెద్దఎల్కిచర్ల వాసి రాజీవ్ రెడ్డిలను పోలీసులు నాగంపై దాడి కేసులో నిందితులుగా గుర్తించారు. శ్రీకాంత్ రాజు అలియాస్ నాగరాజుకు నేరచరిత్ర ఉంది. ప్రజాపంథాలో కొంత కాలం పనిచేశారు. దాని నుంచి సస్పెండయ్యాడు. విజయశాంతి పెట్టిన తల్లి తెలంగాణ పార్టీ జిల్లా కన్వీనర్ గా వ్యవహరించాడు. రిలయన్స్ పెట్రోలు బంక్ లను లక్ష్యంగా చేసుకుని దోపిడీలకు పాల్పడిన కేసులు అతనిపై ఉన్నాయి. ఒక్క నల్లగొండ జిల్లాలోనే అతనిపై 15 నుంచి 20 కేసులున్నాయి. ఒక కేసులో చర్లపల్లి జైలులో ఆరు నెలల శిక్ష కూడా అనుభవించాడు.