• search
  • Live TV
వేగవంతమైన అలర్ట్స్ కోసం
నోటిఫికేషన్స్ పై క్లిక్ చేయండి  
For Daily Alerts

తెలంగాణ జెఎసిలో టిడిపి చేరాలి: జానా

By Pratap
|

Janareddy
హైదరాబాద్: తెలంగాణ రాజకీయ, ప్రజా సంఘాల సంయుక్త కార్యాచరణ కమిటీ (జెఎసి)లో చేరాలని కాంగ్రెసు సీనియర్ శాసనసభ్యుడు, మాజీ హోం మంత్రి కె. జానా రెడ్డి తెలుగుదేశం పార్టీని కోరారు. తెలంగాణ సాధన కోసం అన్ని పార్టీలు, ప్రజా సంఘాలు సమాన భాగస్వాములుగా జెఎసిలో పని చేద్దామని ఆయన అన్నారు. శనివారం న్యూ ఎమ్మెల్యే క్వార్టర్స్ లో తెలంగాణ శాసనభ్యులు, పార్లమెంటు సభ్యులు, ఎమ్మెల్సీలు, నాయకుల సమావేశం అనంతరం ఆయన మీడియా ప్రతినిధులతో మాట్లాడారు. తెలంగాణ రాష్ట్ర సాధన ఉద్యమంలో కాంగ్రెసుది ప్రధాన పాత్ర అని, కాంగ్రెసు ద్వారానే తెలంగాణ సాధ్యమవుతుందని ఆయన అన్నారు. జెఎసి ఇంకా ఏర్పడలేదని ఆయన చెప్పారు.

తాము తెలంగాణపై కేంద్ర ప్రభుత్వానికి అల్టిమేటం ఇవ్వలేదని, ఈ నెల 29వ తేదీ తర్వాత నిరవధిక బంద్ పాటిస్తామని కూడా నిర్ణయం తీసుకోలేదని ఆయన స్పష్టం చేశారు. తాము తిరిగి పిలుపు ఇచ్చేవరకు ఏ విధమైన బంద్ లు పాటించకూడదని ఆయన తెలంగాణ ప్రజలకు విజ్ఞప్తి చేశారు. ఉద్యమంలో హింసాకాండకు, విధ్వంసానికి పాల్పడకూడదని ఆయన కోరారు. అస్తి నష్టం, ప్రాణ నష్టం జరగకుండా చూడాలని కూడా ఆయన కోరారు. నెహ్రూ, ఇందిరా, రాజీవ్ గాంధీల విగ్రహాలను ధ్వంసం చేస్తున్నట్లు వార్తలు వస్తున్నాయని, అది మంచిది కాదని, నాయకులను అవమానించే పద్ధతిలో వ్యవహరించకూడదని ఆయన అన్నారు. తెలంగాణ రాష్ట్రం ఏర్పాటుపై కాంగ్రెసు అధిష్టానం వెనక్కి పోలేదని ఆయన అన్నారు.

తెలంగాణ రాష్ట్ర ఏర్పాటు ప్రక్రియపై కేంద్ర హోం మంత్రి చిదంబరం చేసిన ప్రకటనలో స్పష్టత లేదని ఆయన అన్నారు. తెలంగాణ రాష్ట్ర ఏర్పాటు ప్రక్రియలో స్పష్టత కావాలని, ప్రక్రియ ప్రారంభంలో జాప్యం జరగకూడదని ప్రజలు కోరుతున్నారని, దాని కోసం ప్రజలు ఆందోళనలు చేస్తున్నారని, తెలంగాణ ప్రజల మనోభావాల మేరకు తాము కాంగ్రెసు అధిష్టానంపై ఒత్తిడి తెచ్చేందుకు ప్రయత్నిస్తున్నామని ఆయన చెప్పారు. కేంద్రాన్ని మెప్పించి, ఒప్పించే బాధ్యత తమదేనని కాంగ్రెసు సీనియర్ శాసనసభ్యుడు ఆర్. దామోదర్ రెడ్డి చెప్పారు.

న్యూస్ అప్ డేట్స్ వెంటనే పొందండి
Enable
x
Notification Settings X
Time Settings
Done
Clear Notification X
Do you want to clear all the notifications from your inbox?
Settings X