రాజకీయ కక్షతోనే ఐటి దాడులు: టిడిపి ఎంపీ నామా నాగేశ్వరరావు

హైదరాబాద్: పార్లమెంటులో కేంద్ర కేంద్ర ప్రభుత్వాన్ని తెలుగుదేశం పార్టీ నిలదీస్తున్న కారణంగానే కాంగ్రెస్ ప్రభుత్వం తనపై ఐటి దాడులు చేయిస్తుందని ఖమ్మం పార్లమెంటు సభ్యుడు నామా నాగేశ్వరరావు శుక్రవారం అన్నారు. కక్ష్యసాధింపు చర్యలలో భాగంగానే నాపై దాడులు జరుగుతున్నాయని చెప్పారు. కాంగ్రెస్ ప్రజా వ్యతిరేక విధానాలు ఎండగట్టడం తప్పా అని ప్రశ్నించారు. ప్రజా వ్యతిరేక విధానాలు తప్పకుండా ఇకముందు కూడా ఎండగడుతామని చెప్పారు. ఐటి దాడులు చేసినంత మాత్రాన సమస్య ఏమీ లేదన్నారు. తాను ఎప్పటికప్పుడు పన్నులు కడుతున్నానన్నారు.

రాజకీయ కుట్రతోనే నామా నాగేశ్వరరావు మధుకాన్ కంపెనీలపై ఐటి శాఖ అధికారులు దాడులు చేస్తున్నారని తెలుగుదేశం పార్టీ సీనియర్ నాయకుడు తుమ్మల నాగేశ్వరరావు అన్నారు. దాడులతో తెలుగుదేశం పార్టీని దెబ్బతీయాలని కాంగ్రెస్ పార్టీ చూస్తుందన్నారు. అయితే ఇలాంటి దాడులతో తెలుగుదేశాన్ని దెబ్బతీయలేరన్నారు. నామా ఇంటిపై, కంపెనీలపై జరిగిన దాడులను ఖండిస్తున్నట్టు చెప్పారు.