లోకసత్తా నేత జయప్రకాష్ నారాయణపై దాడి చేసిన మల్లేష్ విడుదల

By Pratap

Published: Tuesday, March 29, 2011, 16:16 [IST]

హైదరాబాద్‌: లోకసత్తా జయప్రకాష్ నారాయణపై శాసనసభలో దాడి చేసిన తెలంగాణ రాష్ట్ర సమితి (తెరాస) శాసనసభా పక్ష నేత ఈటెల రాజేందర్ కారు డ్రైవర్ మల్లేష్ విడుదలకు శాసనసభ మంగళవారం తీర్మానం చేసింది. దాంతో ఆయన హైదరాబాదులోని చర్లపల్లి జైలు నుంచి విడుదలయ్యారు. దాదాపు నలబై ఐదు రోజుల పాటు అతను జైల్లో ఉన్నాడు. శాసనసభ ఆవరణలో జయప్రకాష్ నారాయణపై మల్లేష్ దాడి చేశారు.

శానససభ ఆవరణలోని మీడియా పాయింట్ వద్ద మీడియా ప్రతినిధులతో మాట్లాడిన సందర్భంలో జయప్రకాష్ నారాయణపై మల్లేష్ దాడి చేశాడు. దీంతో మల్లేష్‌ను డిప్యూటీ స్పీకర్ నాదెండ్ల మనోహర్ రిమాండ్‌కు పంపించారు. శాసనసభ ఆవరణలో తెలుగుదేశం సభ్యులపై మంత్రి వైయస్ వివేకానంద రెడ్డి దాడికి ప్రయత్నించిన నేపథ్యంలో మల్లేష్‌పై డిప్యూటీ స్పీకర్ తీసుకున్న చర్యలను ఈటెల రాజేందర్ ప్రశ్నించారు. మల్లేష్‌కు ఓ న్యాయం, వివేకానంద రెడ్డికి మరో న్యాయమా అని ఆయన ప్రశ్నించారు.

Published On March 29, 2011