బాబుతో బర్దన్ బేటీ: ఉప ఎన్నికల్లో టిడిపికి మద్దతు?

By Pratap

Published: Monday, February 20, 2012, 19:54 [IST]

హైదరాబాద్: తెలంగాణ రాష్ట్ర ఏర్పాటుకు అనుకూలంగా నిర్ణయం తీసుకున్నప్పటికీ సిపిఐ తెలుగుదేశం పార్టీతో కలిసి అడుగులు వేయాలనే ఆలోచనలోనే ఉన్నట్లు తెలుస్తోంది. తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు వైఖరి సిపిఐ నాయకత్వానికి నచ్చడం లేదని అంటున్నారు. ఈ స్థితిలో వచ్చే ఉప ఎన్నికల్లో తెలుగుదేశం పార్టీకి మద్దతు పలకడం ద్వారా కెసిఆర్‌ను దెబ్బ తీసే ఆలోచన చేస్తున్నట్లు తెలుస్తోంది. ఇందుకు అనుగుణంగానే తెలుగుదేశం పార్టీ అధ్యక్షుడు నారా చంద్రబాబు నాయుడికి, సిపిఐ ప్రధాన కార్యదర్శి ఎబి బర్దన్‌కు మధ్య చర్చలు సాగినట్లు చెబుతున్నారు.

కరీంనగర్‌లో జరిగే సిపిఐ రాష్ట్ర మహాసభల్లో పాల్గొనడానికి హైదరాబాదు వచ్చిన బర్దన్ సోమవారం సాయంత్రం చంద్రబాబుతో భేటీ అయ్యారు. తాము ఉప ఎన్నికల్లో పోటీ చేయబోమని బర్దన్ చంద్రబాబుతో భేటీ అనంతరం మీడియా ప్రతినిధులతో చెప్పారు. తెలుగుదేశం పార్టీతో తమకు మంచి సంబంధాలున్నాయని, భవిష్యత్తులో కూడా ఆ సంబంధాలు కొనసాగుతాయని ఆయన చెప్పారు. దీన్నిబట్టి తెలంగాణలోని ఆరు స్థానాలకు, కొవ్వూరు సీటుకు జరిగే ఉప ఎన్నికల్లో సిపిఐ తెలుగుదేశం పార్టీకి మద్దతు ఇవ్వవచ్చునని భావిస్తున్నారు.

రెండు స్థానాల్లో సిపిఎం పోటీ చేయాలని నిర్ణయించింది. ఈ స్థానాల్లో సిపిఎంను బలపరిచి మిగతా స్థానాల్లో తెలుగుదేశం పార్టీకి మద్దతు ఇచ్చే అవకాశాలు కూడా లేకపోలేదు. ఉప ఎన్నికల్లో పోటీ చేయాలనేది సిపిఎం అంతర్గత వ్యవహారమని, తాను దాని గురించి మాట్లాడబోనని ఆయన అన్నారు. ప్రజాసమస్యలపై తాము పోరాటం చేస్తామని ఆయన చెప్పారు. సిపిఐ రాష్ట్ర నాయకత్వాన్ని మార్చే విషయంపై మహాసభల్లో ఆలోచన చేస్తామని ఆయన చెప్పారు. సిపిఐ, సిపిఎం జాతీయ నేతలు హైదరాబాదు వచ్చినప్పుడు చంద్రబాబును కలవడం ఆనవాయితీగా వస్తోంది.

Published On February 20, 2012