అన్నాకు సూచన: బిజెపి వైపు కిరణ్ బేడీ చూపు

న్యూఢిల్లీ: ప్రముఖ సామాజిక సంఘ సంస్కర్త అన్నా హజారే బృందం మాజీ సభ్యురాలు కిరణ్ బేడీ భారతీయ జనతా పార్టీ వైపు చూస్తున్నారు. ఆమె బిజెపిలో చేరేందుకు సిద్ధమవుతున్నారనే వ్యాఖ్యలు వినిపిస్తున్నాయి. ఇటీవలి కాలంలో ఆమె చేస్తున్న ప్రకటనలు అందుకు నిదర్శనమని చెబుతున్నారు.

కిరణ్ బేడీ బిజెపిలో చేరి ప్రత్యక్ష రాజకీయాల్లో క్రియాశీలక పాత్ర పోషించే అవకాశాలను కొట్టి పారేయలేమని అంటున్నారు. అన్నా హజారే బృందం సభ్యురాలిగా కేంద్ర ప్రభుత్వం అవినీతిని కిరణ్ బేడీ తూర్పార బట్టిన విషయం తెలిసిందే. అయితే ఆ తర్వాత అన్నా తన బృందాన్ని రద్దు చేసిన తర్వాత ఆమె బిజెపి వైపు చూస్తోందని చెబుతున్నారు.

మూడు రోజల క్రితం అన్నా బృందం మాజీ సభ్యుడు అరవింద్ కేజ్రీవాల్ కాంగ్రెసుతో పాటు బిజెపిని టార్గెట్ చేసుకొని ఆందోళన చేపట్టడాన్ని బేడీ తప్పు పట్టారు. బుధవారం కూడా అన్నా హజారేకు, యోగా గురువు రామ్ దేవ్ బాబుకు బిజెపితో కలిసి ఉద్యమించాలని సూచించారు. అవినీతికి వ్యతిరేకంగా అన్నా, బాబా బిజెపితో కలిసి సంకీర్ణ కూటమిని ఏర్పాటు చేయాలని ఆమె పేర్కొన్నారు.

కుంభకోణాలతో యుపిఏ ప్రభుత్వం చిక్కుల్లో పడిందని, దీనిని అనుకూలంగా మలచుకొని అందరూ కలిసి ఉద్యమిస్తేనే ఫలితం ఉంటుందని ఆమె అభిప్రాయపడ్డారు. ఈ కూటమి ప్రజా గొంతుకగా ఉండాలని ఆమె ఆకాంక్షించారు. అన్నా హజారే పార్టీ స్థాపించే ఉద్దేశ్యంలో భాగంగా తన బృందాన్ని రద్దు చేసిన విషయం తెలిసిందే.

English summary

It is said that Former Anna Hazare group member Kiran Bedi is seeing at Bharatiya Janata Party. She has suggested Anna Hazare and Ramdev Baba that alliance with BJP to fight against UPA corruption.