బాబుతో తమ్ముళ్ల ఆట!: పాదయాత్రలో ట్విస్ట్

By Srinivas

Published: Sunday, April 14, 2013, 10:38 [IST]

తెలుగుదేశం పార్టీ అధ్యక్షుడు నారా చంద్రబాబు నాయుడు 63 ఏళ్ల వయస్సులో ప్రతిష్టాత్మకంగా చేపట్టిన వస్తున్నా మీకోసం పాదయాత్ర దారి తప్పుతోందా? అంటే అవుననే అంటున్నారు. రెండుసారి అధికారానికి దూరమైన పార్టీని 2014లో గట్టెక్కించేందుకు చంద్రబాబు ఈ వయస్సులో భారీ పాదయాత్ర చేస్తున్నారు. అయితే, తెలుగు తమ్ముళ్ల అత్యుత్సాహం వల్ల ఆయన పాదయాత్ర చాలా వరకు నిష్ఫలంగా మిగిలిపోయిందట.

ఇప్పటి వరకు చంద్రబాబు రెండువేల ఐదు వందల కిలోమీటర్లకు పైగా నడిచారు. అయితే అందులో వందల కిలోమీటర్లు తెలుగు తమ్ముళ్లు అత్యుత్సాహంతో అనవసరంగా నడిపించిందేనట. వారు తమ అత్యుత్సాహంతో బాబును ఇబ్బందులకు గురి చేశారంటున్నారు. దీంతో ఆ పాదయాత్ర వృథా అయిందంటున్నారు. నేతలు తమ తమ సొంత నియోజకవర్గాల్లో అధినేతను తిప్పేందుకు ఆసక్తి చూపి కొంత మేర వృథా చేశారట.

అనంతపురం జిల్లా నుండి ప్రారంభమైన పాదయాత్ర అదే జిల్లా నుండే నిష్ఫలమైందట. అనంతలో పాదయాత్ర చేసినప్పుడు బాబు కర్నాటకలో పదకొండు కిలోమీటర్ల మేర యాత్ర చేశారు. తెలుగు వాళ్లు లేనిచోట, తెలుగు ఓటర్లు లేనిచోట ఆయనను తిప్పారట. అంతేకాకుండా నిర్మానుష్య ప్రాంతాల్లోనే కాకుండా కొండలు, గుట్టల్లో ప్రమాదకర మార్గాల గుండా తిప్పారట. తమ తమ మెహర్బానీ కోసం నేతలు బాబును తప్పుదారి పట్టిస్తున్నారంటున్నారు.

చీకట్లో అటవీ ప్రాంతాల్లో తిప్పారు. ఓ నేత అయితే తన మొక్కు కోసం చంద్రబాబును ఓ గుడిలో నిద్రింప చేశారు. ఖమ్మంలో టౌన్ చుట్టు నాలుగు రోజులు తిప్పారట. ఆయా జిల్లాల్లో నేతలు సమన్వయంగా పని చేయకుండా తమ తమ సొంత నియోజకవర్గాలకు ప్రాధాన్యత ఇస్తూ తిప్పిన చోటే, ప్రజలు ఎక్కువగా లేని గ్రామాల్లో తిప్పి బాబుతో ఆడుకుంటున్నారనే కామెంట్స్ వినిపిస్తున్నాయి. ఓ వైపు పార్టీని అధికారంలోకి తెచ్చేందుకు 'లీడర్'గా ప్రయత్నాలు చేస్తుంటే మరోవైపు తమ్ముళ్లు మాత్రం సొంత ఇమేజ్ కోసం బాబును ఇబ్బందులకు గురి చేస్తున్నారంటున్నారు.

Published On April 14, 2013