ఇంట్లోనే ఈజీగా "చికెన్ షవర్మా" ఎలా చేసుకోవాలంటే..?

నేటి కాలంలో చిన్నారుల నుంచి పెద్దల వరకు స్ట్రీట్ ఫుడ్ ఎక్కువగా తినడానికి ఆసక్తి చూపుతున్నారు. మధ్యప్రాచ్య వీధి వంటకాలలో ప్రసిద్ధి పొందిన "చికెన్ షవార్మా" ఇప్పుడు ప్రపంచవ్యాప్తంగా అభిమానులను సంపాదించుకుంది. రోటేటింగ్ స్పిట్‌లపై మెల్లగా కాల్చిన చికెన్ ముక్కల రుచికి సరితూగేదేదీ లేదు అంటే అతిశయోక్తి కాదు. అందుకే మీ కిచెన్‌లోనే రెస్టారెంట్ స్టైల్ షవార్మా సీక్రెట్ రివీల్ చేయబోతున్నాం. ఈ రుచికరమైన షవార్మాను మీరు ఇంట్లోనే సులభంగా ఎలా తయారుచేసుకోవాలో తెలుసుకుందాం..

షవార్మా అంటే ఏమిటి..

'షవార్మా' అనే పదం టర్కిష్ భాషలోని çevirme అనే పదం నుంచి వచ్చింది, దీని అర్థం "తిరగడం" అని. మధ్యప్రాచ్యంలో, మెరినేట్ చేసిన మాంసాన్ని ఒక పెద్ద స్కీవర్‌పై పేర్చి, మోటార్‌తో తిరిగే స్పిట్‌లో కాల్చి, సన్నగా కత్తిరించి అందిస్తారు. ఈ పద్ధతి వల్ల మాంసం బయటనుంచి క్రిస్పీగా, లోపల జ్యుసీగా ఉంటుంది. మాంసం, సాస్‌లు, తాజా కూరగాయలు - ఇవన్నీ కలిపి పిటా లేదా లవాష్ బ్రెడ్‌లో చుట్టితే, ఫుడ్ లవర్స్‌కు అది పరిపూర్ణ ఆనందంగా ఉంటుంది.

మెరినేషన్ సీక్రెట్..

షవార్మా రుచికి ప్రాణం - దాని మెరినేడ్. చికెన్ బ్రెస్ట్స్ లేదా తొడ ముక్కలను 1½ అంగుళాల సైజులో కట్ చేసి, కింది మిశ్రమంలో కనీసం 12 గంటలు మెరినేట్ చేయాలి:

• ఆలివ్ ఆయిల్
• వెల్లుల్లి
• జీలకర్ర పొడి
• కొత్తిమీర పొడి
• పప్రికా లేదా ఎర్ర కారం
• యాలకులు లేదా ఆల్ స్పైస్
• దాల్చినచెక్క
• బ్లాక్ పెప్పర్
• గ్రీక్ యోగర్ట్
• ఉప్పు మరియు కొద్దిగా నిమ్మరసం

ఈ మిశ్రమం వల్ల చికెన్ ముక్కలు సూపర్ సాఫ్ట్‌గా, రుచిగా మారుతాయి. యోగర్ట్ ఉపయోగించడం వల్ల షవార్మా చాలా మెత్తగా, జ్యుసీగా ఉంటుంది.

వంట ప్రక్రియ..

• మీ దగ్గర షవార్మా స్పిట్ లేకపోయినా, టెన్షన్ అవసరం లేదు. ఒక మంచి నాన్-స్టిక్ లేదా గ్రిల్ పాన్ సరిపోతుంది.
• పాన్ బాగా వేడెక్కిన తర్వాత, కొద్దిగా ఆలివ్ ఆయిల్ వేసి చికెన్ ముక్కలను వేయండి.
• అన్ని వైపులా సమానంగా బ్రౌన్ అయ్యేవరకు ఫ్రై చేయండి.
• మెరినేడ్ క్యారమలైజ్ అవ్వడం ప్రారంభమైనప్పుడు, మంటను మధ్యస్థానికి తగ్గించండి.
• చివరగా ఉల్లిపాయ, టమాటా ముక్కలను అదే పాన్‌లో వేసి గ్రిల్ చేయండి - రుచిలో ఓ కొత్త డెప్త్ వస్తుంది!

రెండు సాస్‌లు..

1. గార్లిక్ యోగర్ట్ సాస్:
గ్రీక్ యోగర్ట్, వెల్లుల్లి, ఆలివ్ ఆయిల్, ఉప్పు, మరియు కొద్దిగా నిమ్మరసం కలిపి క్రీమీగా తయారుచేయండి.

2. తహినీ సాస్:
తహినీ (నువ్వుల పేస్ట్), వెల్లుల్లి, నీరు, నిమ్మరసం, ఉప్పు కలిపి బ్లెండ్ చేయండి. చివరగా తాజా పార్స్లీ చల్లండి.

ఈ రెండు సాస్‌లు మీ షవార్మా ఫ్లేవర్‌ను మరింత ఎలివేట్ చేస్తాయి!

సర్వింగ్ ఐడియాస్..

షవార్మాను పిటా, టోర్టిల్లా లేదా లవాష్ బ్రెడ్‌లో చుట్టి, సాస్‌లు, ఉల్లిపాయలు, టమాటాలు, దోసకాయలు, ఊరగాయలు వేసి సర్వ్ చేయండి. గ్లూటెన్-ఫ్రీ ఆహారం తీసుకునేవారు రైస్ లేదా కౌస్‌కౌస్‌తో షవార్మాను ఆస్వాదించవచ్చు. పక్కన ఫ్రెంచ్ ఫ్రైస్ లేదా సలాడ్ వేసుకుంటే ఇక చాలు. వీకెండ్ స్పెషల్‌గా లేదా మీ ఫ్రెండ్స్‌తో ఫుడ్ నైట్‌గా షవార్మాను ట్రై చేయండి.

English summary

Nowadays, people from children to adults are increasingly interested in eating street food. “Chicken Shawarma”, a popular Middle Eastern street food, has now gained fans all over the world.