బాబుతో కలిసి ప్రభుత్వం: కారత్

న్యూఢిల్లీ: తెలుగుదేశం పార్టీ అధ్యక్షుడు నారా చంద్రబాబు నాయుడితో కలిసి కేంద్రంలో ప్రభుత్వాన్ని ఏర్పాటు చేస్తామని సిపిఎం ప్రధాన కార్యదర్శి ప్రకాష్ కారత్ చెప్పారు. తెలుగుదేశం, అన్నాడియంకె, జెడి(ఎస్)వంటి లౌకిక పార్టీలతో కలిసి కేంద్రంలో ప్రభుత్వాన్ని ఏర్పాటు చేస్తామని ఆయన శుక్రవారం మీడియా ప్రతినిధుల సమావేశంలో చెప్పారు. కేంద్రంలో కాంగ్రెసేతర లౌకిక ప్రభుత్వ ఏర్పాటుకు కట్టుబడి ఉన్నామని ఆయన చెప్పారు.

వివిధ రాష్ట్రాలకు చెందిన లౌకిక పార్టీలతో ఎన్నికల అనంతరం చర్చించి కార్యాచరణను రూపొందిస్తామని, ప్రధాని అభ్యర్థిని కూడా ఎన్నికల తర్వాతనే ఖరారు చేసుకుంటామని ఆయన చెప్పారు. కాంగ్రెస్ తో కలిసి ప్రభుత్వాన్ని ఏర్పాటు చేసే ప్రసక్తి లేదని ఆయన మరోసారి స్ఫష్టం చేశారు. ఎల్టీటిఇ తన విఫలయత్నాలను మానుకోవాలని ఆయన సూచించారు. ఎల్టీటిఇ ప్రతిఘటన వల్ల అమాయకులు ప్రాణాలు కోల్పోతున్నారని ఆయన అన్నారు.