దేవినేని ఉమ దీక్ష భగ్నానికి విఫల యత్నం

విజయవాడ: సమైక్యాంధ్ర డిమాండ్ తో ప్రారంభించిన శాసనసభ్యుడు దేవినేని ఉమా మహేశ్వర రావు తదితర తెలుగుదేశం నేతల ఆమరణ నిరాహార దీక్షను భగ్నం చేయడానికి పోలీసులు విఫలయత్నం చేశారు. బుధవారం తెల్లవారు జామున మూడు గంటల ప్రాంతంలో పోలీసులు వారి దీక్షను భగ్నం చేయడానికి ప్రయత్నం చేసి విఫలమయ్యారు. వారి దీక్ష బుధవారంనాటికి మూడో రోజుకు చేరింది. దేవినేని ఉమ నేతృత్వంలోని దీక్షను భగ్నం చేయడానికి చేసిన ప్రయత్నాలను తెలుగుదేశం పార్టీ కార్యకర్తలు ప్రతిఘటించారు. దీక్షా శిబిరాన్ని తొలగించవద్దని వారు పోలీసుల కాళ్లపై పడ్డారు. పోలీసులు చివరికి నిరాహార దీక్ష చేస్తున్న శాసనసభ్యుడు రామకోటయ్య, అనురాధలను ఆస్పత్రికి తరలించారు. దీంతో తీవ్ర ఉద్రిక్తత చోటు చేసుకుంది.

విశాఖపట్నంలో ఆంధ్రా విశ్వవిద్యాలయలంలో విద్యార్థులు చేపట్టిన రిలే నిరాహార దీక్షను పోలీసులు బుధవారం భగ్నం చేశారు. సమైక్యాంధ్రను కాంక్షిస్తూ ఆమరణ దీక్ష చేపట్టిన ఎయు విద్యార్థులు కెజిహెచ్ లో నిరశన కొనసాగిస్తున్నారు. సమైక్యాంధ్ర నినాదంతో గుంటూరులో ఆమరణ నిరాహార దీక్ష చేస్తున్న ఐదుగురు విద్యార్థుల్లో ఇద్దరు ఆస్వస్థతకు గురయ్యారు.