తెలంగాణపై సిపిఐ ఎమ్మెల్యేల రాజీనామా

హైదరాబాద్: తెలంగాణ రాష్ట్ర ఏర్పాటు ప్రక్రియను ప్రారంభించాలని డిమాండ్ చేస్తూ సిపిఐ శాననసభ్యులు కూడా రాజీనామాల బాట పట్టారు. తెలంగాణ ప్రాంత సిపిఐ శాసనసభ్యులు రాజీనామాలు చేశారు. పార్టీ ఆదేశానుసారం వారు తమ రాజీనామా లేఖలను పార్టీ రాష్ట్ర కార్యాలయానికి పంపించారు. జిల్లాల్లోని పరిస్థితులను వివరిస్తూ శాననసభ్యుల నుంచి వచ్చిన ప్రతిపాదనల మేరకే పార్టీ వారి రాజీనామాలకు ఆమోదం తెలిపినట్లు సమాచారం.

తాజా రాష్ట్ర రాజకీయ పరిణామాలపై చర్చించేందుకు శుక్రవారం మఖ్దూం భవన్ అందుబాటులో ఉన్న పార్టీ కార్యదర్శి వర్గ సభ్యుల సమావేశం జరిగింది. తెలంగాణ అంశంపై శాసనసభ్యుల మనోభావాలకు ప్రాధాన్యం ఇవ్వాలని ఆ సమావేశంలో నిర్ణయం తీసుకున్నట్లు సమాచారం. అంతకు ముందే నలుగురు శాననసభ్యులు, వివిధ స్థాయిల్లోని ప్రజాప్రతినిధులు రాజీనామాలు చేసేందుకు పార్టీ అనుమతి కోరినట్లు సమాచారం. తెలంగాణ రాష్ట్ర ఏర్పాటుకు అనుకూలంగా సిపిఐ ఇప్పటికే నిర్ణయం తీసుకున్న విషయం తెలిసిందే.