కొత్త రికార్డులతో ప్రారంభమై.. మధ్యాహ్నానికి చతికిలపడి.. సాయంత్రానికి భారీ నష్టాలు!

దేశీయ మార్కెట్లు మంగళవారం భారీ నష్టాలను చవిచూశాయి. అంతర్జాతీయ మార్కెట్ల అండతో ఆరంభ ట్రేడింగ్‌లో కొత్త రికార్డులతో మొదలైనప్పటికీ..

ముంబై: దేశీయ మార్కెట్లు మంగళవారం భారీ నష్టాలను చవిచూశాయి. అంతర్జాతీయ మార్కెట్ల అండతో ఆరంభ ట్రేడింగ్‌లో కొత్త రికార్డులతో మొదలైనప్పటికీ.. మధ్యాహ్నానికి సూచీలు చతికిలపడ్డాయి.

సెప్టెంబర్‌ పారిశ్రామికోత్పత్తి, జీఎస్టీ కౌన్సిల్‌ సమావేశాల నేపథ్యంలో మదుపర్లు అప్రమత్తత పాటించారు. దీంతో చివరి గంటల్లో అమ్మకాలు వెల్లువెత్తడంతో సూచీలు తీవ్ర ఒత్తిడికి గురయ్యాయి.

సెన్సెక్స్‌ 350 పాయింట్లు కోల్పోగా.. నిఫ్టీ 10,400 దిగువకు పడిపోయింది. మంగళవారం ఉదయం 100 పాయింట్లకు పైగా లాభంతో ఉత్సాహంగా ప్రారంభమైన సెన్సెక్స్‌.. ఆ తర్వాత నష్టాల్లోకి జారుకుంది.

బ్యాంకింగ్‌, ఫార్మా రంగాల షేర్లు కుదేలవడంతో సూచీ మరింత దిగజారింది. దీంతో భారీ నష్టాన్ని చవిచూసింది. మంగళవారం నాటి ట్రేడింగ్‌లో 360 పాయింట్లు కోల్పోయిన సెన్సెక్స్‌.. 33,371 వద్ద స్థిరపడింది. అటు నిఫ్టీ కూడా 102 పాయింట్లు నష్టపోయి 10,350 వద్ద ముగిసింది. డాలర్‌తో రూపాయి మారకం విలువ మరింత బలహీనపడి రూ. 65.03గా కొనసాగుతోంది.

లుపిన్‌ షేర్లు కుదేలు

ఔషద ఉత్పత్తుల సంస్థ లుపిన్‌ షేర్లు కుదేలయ్యాయి. గోవా, ఇండోర్‌లలోని లుపిన్‌ తయారీ కేంద్రాలకు అమెరికా హెల్త్‌ రెగ్యులేటరీ హెచ్చరికలు జారీ చేసింది. దీంతో షేర్లు భారీగా నష్టపోయాయి.

ఎన్‌ఎస్‌ఈలో లుపిన్‌ ఒక్కో షేరు విలువ దాదాపు 17 శాతం పడిపోయింది. ఇక సిప్లా, ఎస్‌బీఐ, ఎయిర్‌టెల్‌, యూపీఎల్‌ లిమిటెడ్‌ షేర్లు కూడా పడిపోగా.. హెచ్‌సీఎల్‌ టెక్నాలజీస్‌, ఇన్ఫోసిస్‌, హిందుస్థాన్‌ పెట్రోలియం, టెక్‌మహింద్రా, టీసీఎస్‌ షేర్లు స్వల్పంగా లాభపడ్డాయి.

English summary

The Sensex and Nifty closed nearly 1 percent lower onTuesday dragged by the Lupin stock which crashed after the pharma firm said US FDA issued a warning letter to company's Goa and Indore sites which would result in likely delay of new product approvals from Goa, Pithampur facilities. While the Sensex closed 360 points or 1.07 percent lower at 33,370 level, the Nifty ended 0.97 percent or 101.65 points points lower at 10,350 level. We look at key highlights, which affected the market today.