కసబ్ వయస్సుపై విచారణకు ఆదేశం

ముంబయి: ముంబయి దాడుల కేసు ప్రధాన నిందితుడు అజ్మల్ అమీర్ కసబ్ వయస్సును నిర్ధారించడానికి విచారణ జరపాలని ప్రత్యేక కోర్టు శుక్రవారం ఆదేశాలు జారీ చేసింది. నేరం చేసిన సమయంలో కసబ్ కు 18 ఏళ్లు నిండాయా లేదా అనే విషయాన్ని నిర్ధారించడానికి డాక్టర్స్, జైలర్ లతో కూడిన సాక్షులను ఈ నెల 28వ తేదీలోగా విచారణ జరపాలని న్యాయమూర్తి ఎంఎల్ తహిలియానీ ప్ర్తత్యేక పబ్లిక్ ప్రాసిక్యూటర్ ఉజ్వల్ నికమ్ ను ఆదేశించారు. వయస్సును నిర్ధారించడానికి ఓసిఫికేషన్ పరీక్ష, డెంటల్ టెస్టు నిర్వహించడానికి కసబ్ ను తీసికెళ్లాలని కోర్టు జైలు అధికారులను ఆదేశించింది.

పరీక్షలు నిర్వహించే రేడియోలజిస్టు, డెంటిస్టు ఈ నెల 26న లేదా అంతకు ముందు నివేదిక సమర్పించాలని కోర్టు సూచించింది.టెస్టుల కోసం భారీ భద్రతతో కసబ్ ను తీసుకుని వెళ్లనున్నట్లు కసబ్ తరఫు న్యాయవాది అబ్బాస్ కజ్మీ చెప్పారు. నేరం చేసిన సమయంలో కసబ్ కు 18 ఏళ్ల వయస్సు దాటలేదని వాదిస్తూ కసబ్ ను జ్యువెనైల్ కోర్టులో విచారించాలని కజ్మీ కోర్టును కోరారు. దీంతో కసబ్ వయస్సు నిర్ధారణ విషయం ముందుకు వచ్చింది.