విమానం పేల్చివేత కుట్ర వెనక ఆల్ ఖైదా

డెట్రాయిట్: అమెరికా విమానం పేల్చివేత ప్రయత్నం వెనక ఆల్ ఖైదా హస్తం ఉన్నట్లు అనుమానిస్తున్నారు. ఆమ్ స్టర్ డమ్ నుంచి డెట్రాయిట్ వస్తున్న విమానాన్ని పేల్పివేయడానికి విఫలయత్నం జరిగింది. విమానంలో ప్రయాణిస్తున్న నైజీరియా పౌరుడు విమానంలో బాణసంచా వంటి పేలుడు పదార్థాలను పేల్చడానికి ప్రయత్నించినట్లు సమాచారం. అవి పేలకపోవడంతో పెద్ద ప్రమాదం తప్పింది.

విమానంలో 278 మంది ప్రయాణికులున్నారు. విమానాశ్రయం నుంచి బయలుదేరిన 20 నిమిషాలకు ఆ సంఘటన జరిగింది. పేలుడు పదార్థాలను పేల్చడానికి ప్రయత్నించిన వ్యక్తిపైకి మరో వ్యక్తి దూకి అతన్ని అడ్డగించే ప్రయత్నం చేశాడు. మిగతా వారు అతన్ని ఆపడానికి ప్రయత్నించారు. ఆ వ్యక్తి ప్యాంట్స్ సగం చిరిగి పోయాయి. కాళ్లు కాలిపోయాయి. ఆ తర్వాత విమానం డెట్రాయిట్ లో సురక్షితంగా దిగింది. ఆ వ్యక్తిని పోలీసులు అదుపులోకి తీసుకుని ప్రశ్నిస్తున్నారు.

సమాచారం అందిన వెంటనే అమెరికా అధ్యక్షుడు బరాక్ ఒబామా విమాన భద్రతా సిబ్బందితో మాట్లాడారు. ఈ సంఘటనతో అమెరికాలో రెడ్ అలర్డ్ ప్రకటించారు. ప్రయాణికుల భద్రతకు అన్ని చర్యలూ తీసుకుంటున్నట్లు అమెరికా శ్వేత సౌధం అధికారులు చెప్పారు.