సోమవారం ఢిల్లీకి తెలంగాణ మంత్రులు

హైదరాబాద్: తెలంగాణ అంశంపై తెలంగాణ మంత్రులు సోమవారం ఢిల్లీకి వెళ్లనున్నారు. తెలంగాణ రాష్ట్ర ఏర్పాటు ప్రక్రియకు నిర్దిష్టమైన గడువు విధించాలని తమ కాంగ్రెసు పార్టీ అధిష్టానాన్ని కోరేందుకు వారు ఢిల్లీకి వెళ్లాలని నిర్ణయించుకున్నారు. పార్టీ అధ్యక్షురాలు సోనియా గాందీని, ప్రధాని మన్మోహన్ సింగ్ ను కలిసేందుకు వారు అపాయింట్ మెంట్ అడిగారు. అదే సమయంలో వారు పార్టీ అధిష్టానానికి చెందిన అహ్మద్ పటేల్, వీరప్ప మొయిలీ ఆంటోనీలతో సమావేశం అవుతారు.

తెలంగాణ ప్రక్రియకు నిర్దిష్టమైన గడువు పెట్టాలని కోరుతూ తెలంగాణ మంత్రులు శుక్రవారం రాజీనామాలు చేశారు. ఒకే పత్రంపై 12 మంత్రులు తమ రాజీనామాలను ముఖ్యమంత్రి కె. రోశయ్యకు సమర్పించారు. కేంద్ర హోం మంత్రి పి. చిదంబరం రెండోసారి తెలంగాణపై చేసిన ప్రకటన స్పష్టంగా లేదని తెలంగాణ మంత్రులు అంటున్నారు. ఆ స్పష్టత రావాలని, తెలంగాణ ప్రక్రియను ప్రారంభించి ముగించడానికి అవసరమైన కాలపరిమితిని పెట్టాలని వారు డిమాండ్ చేస్తున్నారు.