Gold rates: రూ.1.40 లక్షలు దాటిన తులం బంగారం! 2026లో రూ.1.50 లక్షలు గ్యారెంటీనా?

బంగారం అంటే భారతీయులకు ఒక సెంటిమెంట్ మాత్రమే కాదు.. ఒక సురక్షితమైన పెట్టుబడి కూడా. అయితే గత కొన్ని రోజులుగా బంగారం ధరలు (gold rates) చూస్తుంటే మధ్యతరగతి సామాన్యుడికి చమటలు పడుతున్నాయి. అంతర్జాతీయ అనిశ్చితి, భౌగోళిక రాజకీయ ఉద్రిక్తతల మధ్య పసిడి ధరలు సరికొత్త రికార్డులను సృష్టిస్తున్నాయి.

తాజాగా మల్టీ కమోడిటీ ఎక్స్ఛేంజ్ (MCX)లో 10 గ్రాముల బంగారం ధర ఏకంగా రూ.1,40,465 మార్కును తాకి చరిత్ర సృష్టించింది. మార్కెట్ ముగిసే సమయానికి కొంత తగ్గి రూ.1,39,940 వద్ద స్థిరపడినప్పటికీ, బులియన్ మార్కెట్‌లో మాత్రం ట్రెండ్ చాలా హాట్‌గా ఉంది.

హైదరాబాద్‌తో పాటు ప్రధాన నగరాల్లో నేటి ధరలు

భారతదేశంలోని వివిధ నగరాల్లో పన్నులు, మేకింగ్ ఛార్జీల వల్ల ధరల్లో స్వల్ప తేడాలు ఉన్నాయి. డిసెంబర్ 28, 2025 నాటి ధరలు ఇలా ఉన్నాయి..

• హైదరాబాద్ లో 24 క్యారెట్ల ధర (10 గ్రా) రూ. 1,40,260 ఉండగా 22 క్యారెట్ల ధర (10 గ్రా) రూ.1,28,572 ఉంది.
• విజయవాడ/చెన్నై లో 24 క్యారెట్ల ధర (10 గ్రా) రూ. 1,40,450 ఉండగా 22 క్యారెట్ల ధర (10 గ్రా) రూ. 1,28,746 ఉంది.
• బెంగళూరు లో 24 క్యారెట్ల ధర (10 గ్రా) రూ. 1,40,150 ఉండగా 22 క్యారెట్ల ధర (10 గ్రా) రూ. 1,28,471ఉంది.
• ముంబై లో 24 క్యారెట్ల ధర (10 గ్రా) రూ. 1,40,040 ఉండగా 22 క్యారెట్ల ధర (10 గ్రా) రూ. 1,28,370 ఉంది.
• ఢిల్లీలో 24 క్యారెట్ల ధర (10 గ్రా) రూ. 1,39,800 ఉండగా 22 క్యారెట్ల ధర (10 గ్రా) రూ. 1,28,150ఉంది.

2026లో బంగారం రూ.1.50 లక్షలకు చేరుతుందా?

మార్కెట్ నిపుణుల విశ్లేషణ ప్రకారం.. బంగారం ధరలు ఆగడం లేదు. ప్రస్తుతం ఉన్న ట్రెండ్‌ను బట్టి చూస్తే త్వరలోనే ఇది రూ.1,45,000 మార్కును చేరుకుంటుందని అంచనా వేస్తున్నారు. ఒక్కసారి రూ.1,45,000 మార్కును దాటితే 2026 మధ్య నాటికి తులం బంగారం రూ.1.50 లక్షల గరిష్ట స్థాయిని తాకడం ఖాయమని నిపుణులు అభిప్రాయపడుతున్నారు.

ఎందుకీ భారీ పెరుగుదల?

బంగారం ధరలు పెరగడానికి ప్రధానంగా మూడు కారణాలు కనిపిస్తున్నాయి:

1. గ్లోబల్ రిస్క్: ప్రపంచవ్యాప్తంగా నెలకొన్న అనిశ్చితి వల్ల ఇన్వెస్టర్లు సురక్షిత పెట్టుబడిగా బంగారాన్ని ఎంచుకుంటున్నారు.
2. సెంట్రల్ బ్యాంకుల కొనుగోళ్లు: ప్రపంచ దేశాల సెంట్రల్ బ్యాంకులు భారీగా బంగారాన్ని నిల్వ చేస్తున్నాయి.
3. రూపాయి విలువ: డాలర్ తో పోలిస్తే రూపాయి విలువలో మార్పులు కూడా దేశీయంగా ధరలపై ప్రభావం చూపుతున్నాయి.

వెండి ధరలు కూడా అదుపులో లేవు!

బంగారంతో పోటీగా వెండి కూడా పరుగులు పెడుతోంది. గత వారంలోనే వెండి ధర సుమారు 15% పెరిగి కేజీకి రూ. 2.42 లక్షల సరికొత్త రికార్డును తాకింది. పారిశ్రామిక అవసరాలు పెరగడం, సప్లై లోటు ఉండటమే దీనికి ప్రధాన కారణం.

పెళ్లిళ్ల సీజన్ సమీపిస్తున్న తరుణంలో బంగారం ధరలు (gold rates) ఇలా పెరగడం సామాన్యులకు ఇబ్బందే. అయితే మార్కెట్ నిపుణుల ప్రకారం.. రూ.1,45,000 దగ్గర కొంత ప్రాఫిట్ బుకింగ్ జరిగే అవకాశం ఉంది. అప్పుడు ధర స్వల్పంగా తగ్గే ఛాన్స్ ఉంది. కొనేవారు అప్పటివరకు వేచి చూడటం మంచిదని నిపుణుల సలహా.

Credit: Goodreturns