కెసిఆర్ 'ఆక్రమణ' పోరు

తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు ఉద్యమం కొత్త మలుపు తీసుకుంటున్న సూచనలు కనిపిస్తున్నాయి. నిధులు, నియామకాలు, నీళ్లను దాటి ఆయన ఉద్యమం తెలంగాణ భూముల అక్రమణ వైపు మళ్లింది. ఇది పునాది ఉద్యమంగా మారే అవకాశం ఉంది. నిధులు, నియామకాలు, నీళ్లను కొల్లగొట్టుకుపోయే వైఖరులను నిరంతరాయంగా కొనసాగిస్తూ ఇప్పుడు ఆంధ్ర పలస దురాక్రమణదారులు భూకబ్జాలకు పాల్పడుతున్నారని కెసిఆర్ ఆరోపిస్తున్నారు. భూముల అక్రమ కబ్జా ఎలా సాగుతోందో ఆయన శనివారం మీడియా ప్రతినిధుల సమావేశంలో రెండు మూడు ఉదాహరణలు మాత్రమే ఇచ్చారు. ఇలాంటి కబ్జాలు పెద్ద యెత్తున జరిగాయనేది కాదనలేని విషయం. ఈ కబ్జాకు చట్టబద్దత, న్యాయబద్ధత కల్పించడానికి ప్రత్యేక ఆర్థిక మండళ్లు (సెజ్ లు) ముందుకు వచ్చాయని చెబుతున్న వాదనకు ఆయన చెప్పిన ఉదంతాలు బలం చేకూరుస్తున్నాయి.

తెలంగాణలో జమీందార్లు, భూస్వాముల చేతుల్లో ఉన్న భూముల కోసం సాయుధ పోరాటం, నక్సలైట్ ఉద్యమాలు సాగాయి, సాగుతున్నాయి. ఈ ఉద్యమాలు కేవలం వ్యవసాయ భూములకు మాత్రమే పరిమితమయ్యాయి. ఇప్పుడు పట్టణ, పట్టణ శివారు ప్రాంతాల భూకబ్జాలను వెలికి తీసే ఉద్యమానికి కెసిఆర్ శ్రీకారం చుట్టారు. లక్ష్మీనగర్ భూపోరాటమే తెలుగుదేశం వైఖరిని బయటపెట్టింది. లక్ష్మీనగర్ కబ్జాను పూర్తిగా తెలుగుదేశం శాసనసభ్యుడు హనుమంతరావు వెనకేసుకొచ్చారు. ఇది కేవలం చిన్న సంఘటన మాత్రమే. మిగతా భూముల వ్యవహారాలు కూడా బయట పడితే పరిస్థితి ఎలా ఉంటుందనేది చెప్పనలవి కాదు.

సినిమా ప్రముఖులకు భూములకు గల అవినాభావ సంబంధాన్ని కూడా కెసిఆర్ బయట పెడుతున్నారు. చెన్నారెడ్డి ముఖ్యమంత్రిగా ఉన్నప్పుడు హైదరాబాదులో సినీ పరిశ్రమను నెలకొల్పడానికి స్టూడియోలకు భూములిచ్చారు. భూముల విలువ ఏపాటిదే ఆ రకంగా సినీ ప్రముఖులకు తెలియవచ్చింది. దాంతో సినీ ప్రముఖులు చాలా మంది తెలంగాణ భూములపై పడ్డారు. ముఖ్యంగా హైదరాబాద్ నగర భూముల వ్యాపారంలో కొంత మంది సినీ ప్రముఖులు పీకల దాకా మునిగి ఉన్నారనేది అందరికీ తెలిసిన విషయమే. ఆ భూముల లావాదేవీలు బయటకు వస్తే చాలా విషయాలు బయటపడతాయి. ఈ విషయాలను వెలికి తీయడానికి కెసిఆర్ పూనుకున్నట్లే ఉన్నారు. మొత్తం మీద కెసిఆర్ అత్యంత ముఖ్యమైన సమస్యను ముందుకు తెచ్చి పోరాటం చేసేందుకు సిద్ధపడ్డారు. ఇది ఎటు దారి తీస్తుందనేది ఇప్పుడే చెప్పలేం.