రిపబ్లిక్‌ డే విధ్వంస కుట్ర భగ్నం

నోయిడా: రిపబ్లిక్‌ డే రోజున విధ్వంసం సృష్టించడానికి ఉగ్రవాదులు పన్నిన కుట్రను ఉత్తర ప్రదేశ్‌ పోలీసులు ఛేదించారు. దీంతో ఢిల్లీకి పెద్ద ముప్పు తప్పిందని ఇంటలిజెన్స్‌ వర్గాలు భావిస్తున్నాయి.గణతంత్ర దినోత్సవం రోజున దేశ రాజధానిలో పలు ప్రాంతాల్లో విధ్వంసం సృష్టించడానికి ఉగ్రవాదమూకలు పథకం రచించినట్లు ఢిల్లీ పోలీసు వర్గాలు అంటున్నాయి.

ఈ తెల్లవారుఝామున నోయిడాలో జరిగిన ఎన్‌కౌంటర్లో ఇద్దరు ఉగ్రవాదులు హతమయ్యారు. నొయిడాలోని మహా మాయ ఇంటర్‌ కాలేజీ దగ్గర యాంటీ టెర్రరిస్ట్‌ స్క్వాడ్‌తో జరిగిన హోరాహోరీ పోరులో మృతి చెందిన తీవ్రవాది పాకిస్థానీయుడుగా గుర్తించారు. వీరి దగ్గర నుంచి పాక్‌ పాస్‌పోర్ట్‌, రెండు ఏకే 47 రైఫిల్స్‌, నాలుగు గ్రెనేడ్లు, పెద్దయెత్తున నగదు, మారుతీ కారును స్వాధీనం చేసుకున్నారు.

ఆయుధాలను తరలిస్తున్నారన్న సమాచారం అందుకున్న పోలీసులు మారుతి కారును వెంబడించి అడ్డుకున్నారు. దీంతో తీవ్రవాదులు ఒక్కసారిగా కాల్పులు జరపడంతో పోలీసులు అప్రమత్తమై ఎదురుకాల్పులు జరిపారు. ఈ కాల్పుల్లో ఇద్దరు తీవ్రవాదులు హతమైనట్లు పోలీసు అధికారులు తెలిపారు. చనిపోయినవారు పాక్‌ దేశస్తులుగా గుర్తించారు. రిపబ్లిక్‌ దినోత్సవ సందర్భంగా భారీ విధ్వాంసానికి కుట్ర పన్నినట్లు అనుమానిస్తున్నారు. కారునుంచి పాస్‌పోర్టు, ఆయుధాలు స్వాధీనం చేసుకున్నారు. ఎదురు కాల్పుల్లో ఒక కానిస్టేబుల్‌కు స్వల్పంగా గాయాలయ్యాయి.